இங்கிலாந்து: இங்கிலாந்தின் மெர்சிசைடில் உள்ள ஹூய்டன் (Huyton) நகரில் பெரும் பரபரப்பு ஏற்பட்டுள்ளது. அங்குள்ள குடியிருப்புப் பகுதி ஒன்றில் இருவர் கத்தியால் குத்தப்பட்டதாகத் தகவல் வெளியானதையடுத்து, சம்பவ இடத்திற்கு விரைந்த ஆயுதம் ஏந்திய காவல்துறை, சந்தேக நபர் ஒருவர் மீது துப்பாக்கிச் சூடு நடத்தியுள்ளது.
ப்ளூபெல் எஸ்டேட் (Bluebell Estate) பகுதியில் துப்பாக்கிச் சூடு சத்தம் கேட்டதாகவும், அதைத் தொடர்ந்து வான்வழி ஆம்புலன்ஸ் ஒன்று தரையிறங்குவதாகவும் தகவல்கள் வெளியாகின. அப்பகுதியின் அலமெய்ன் சாலை (Alamein Road), சலெர்னோ டிரைவ் (Salerno Drive) மற்றும் டொப்ரூக் சாலை (Tobruk Road) முழுவதும் தற்போது காவல்துறை தடுப்புகள் அமைக்கப்பட்டு, ஏராளமான அதிகாரிகள் தீவிர பணியில் ஈடுபட்டுள்ளனர்.
இது தொடர்பாக காவல்துறை தற்போது வெளியிட்டுள்ள அறிக்கையில், மாலை 4.25 மணியளவில் டொப்ரூக் சாலை பகுதியில் ஒரு ஆணும் பெண்ணும் கத்தியால் குத்தப்பட்டதாகத் தங்களுக்குத் தகவல் கிடைத்ததாக உறுதிப்படுத்தப்பட்டுள்ளது. சம்பவ இடத்திற்கு விரைந்த ஆயுதப் பிரிவு அதிகாரிகள், சந்தேக நபர் மீது துப்பாக்கிச் சூடு நடத்தியதாகவும், துப்பாக்கிச் சூட்டில் காயமடைந்த சந்தேக நபர் சிகிச்சைக்காக மருத்துவமனைக்குக் கொண்டு செல்லப்பட்டுள்ளதாகவும் தெரிவிக்கப்பட்டுள்ளது.
“இந்தச் சம்பவத்தின் முழுமையான சூழ்நிலைகளை கண்டறிய விசாரணை நடைபெற்று வருகிறது, மேலும் அப்பகுதி சீல் வைக்கப்பட்டுள்ளது. அதிகாரிகள் சம்பவ இடத்திலேயே தொடர்ந்து உள்ளதாகவும், வீடு வீடாகச் சென்றும், சிசிடிவி காட்சிகளை ஆய்வு செய்தும் விசாரணைகளை மேற்கொண்டு வருவதாகவும்” அந்த அறிக்கையில் மேலும் குறிப்பிடப்பட்டுள்ளது.
இந்தச் சம்பவம் அப்பகுதி மக்களிடையே அச்சத்தையும் பரபரப்பையும் ஏற்படுத்தியுள்ளது.