சிலி நாட்டின் தெற்குப் பகுதியில் அமைந்துள்ள பிரபலமான பாடகோனியா (Patagonia) பிரதேசத்தில் வீசிய கடுமையான பனிப்புயலில் சிக்கி ஐந்து வெளிநாட்டுச் சுற்றுலாப் பயணிகள் உயிரிழந்துள்ளனர். காணாமல் போனதாக அறிவிக்கப்பட்ட மேலும் நான்கு பேர் உயிருடன் மீட்கப்பட்டனர்.
இந்தத் துயரச் சம்பவம், மலையேறுபவர்கள் மத்தியில் மிகவும் பிரபலமான டொரஸ் டெல் பைன் தேசியப் பூங்காவில் (Torres del Paine National Park) உள்ள ‘லாஸ் பெரோஸ் முகாம்’ (Los Perros camp) அருகே நிகழ்ந்துள்ளது.
கடந்த திங்கள் கிழமை அன்று திடீரென ஏற்பட்ட இந்தப் பனிப்புயல் மற்றும் சூறாவளி போன்ற பலத்த காற்றினால் (மணிக்கு 193 கி.மீ. – 120 mph வரை) இந்தப் பகுதி சூழப்பட்டது.
உயிரிழந்த ஐந்து பேரில் இருவர் மெக்சிகோவைச் சேர்ந்தவர்கள், இருவர் ஜெர்மனியைச் சேர்ந்தவர்கள் மற்றும் ஒருவர் பிரிட்டனைச் சேர்ந்த பெண் என்று மாகாணப் பிரதிநிதி ஜோஸ் அன்டோனியோ ரூயிஸ் உறுதிப்படுத்தியுள்ளார்.
இவர்கள் ஒரு வழிகாட்டி (tour guide) இல்லாமல் மலையேற்றம் செய்ததாகத் தகவல் வெளியாகியுள்ளது.
மோசமான வானிலை காரணமாக ஹெலிகாப்டர்கள் மூலம் மீட்புப் பணிகளை மேற்கொள்ள முடியவில்லை. சுமார் 24 பேர் கொண்ட மீட்புக் குழுவினர், பொலிஸார் மற்றும் இராணுவ வீரர்கள் கொண்ட குழு கடுமையாகப் போராடி, தொலைதூரப் பகுதியில் சிக்கியிருந்த நான்கு பேரை உயிருடன் மீட்டனர்.
சிலியின் ஜனாதிபதி கேப்ரியல் போரிக், இந்தத் “துயரச் சம்பவம்” குறித்துப் பாதிக்கப்பட்டவர்களின் குடும்பங்களுக்குத் தனது ஆழ்ந்த இரங்கலைத் தெரிவித்துக் கொண்டார்.
தற்போது, உயிரிழந்தவர்களின் உடல்களை வெளியேற்றும் பணிகளும், அவர்களின் சொந்த நாடுகளின் தூதரக நடைமுறைகளைச் சரிசெய்யும் பணிகளும் வானிலை மேம்பட்டவுடன் தொடங்கும் என்று அதிகாரிகள் அறிவித்துள்ளனர்.