எகிப்தின் மேற்குப் பாலைவனத்தில் (Western Desert) சுமார் 80 மில்லியன் ஆண்டுகள் பழமையான கடல் முதலை (Marine Crocodile) படிமங்கள் கண்டுபிடிக்கப்பட்டுள்ளன. இந்தப் புதிய கண்டுபிடிப்பு, முதலைகளின் பரிணாம வளர்ச்சி குறித்த முந்தைய புரிதல்களை மாற்றியமைத்து, ஆய்வாளர்களை குழப்பத்தில் ஆழ்த்தியுள்ளது.
- புதிய இனம்: இந்தக் கடல் முதலை இனம், வாடிசூக்கஸ் கஸாபி (Wadisuchus kassabi) என்று பெயரிடப்பட்டுள்ளது. இது டைரோசாரிடே (Dyrosauridae) என்ற கடல் முதலை குடும்பத்தின் மிகவும் பழமையான உறுப்பினராகும்.
- பழமை: இந்தப் படிமம் சுமார் 8 கோடி ஆண்டுகளுக்கு முந்தையது, இது டைரோசாரிடே குழுவின் பரிணாம காலத்தை முன்பு கருதப்பட்டதைவிட 10 மில்லியன் ஆண்டுகள் பின்னோக்கித் தள்ளுகிறது.
- ஆப்பிரிக்காவின் பிறப்பிடம்: இந்தக் கண்டுபிடிப்பின் மூலம், கடல் முதலைகளின் பிறப்பிடம் ஆப்பிரிக்கா, குறிப்பாக எகிப்து தான் என்பது உறுதியாகியுள்ளது. இந்த இனமே பிற்காலத்தில் உலகின் பிற கடலோரப் பகுதிகளுக்குப் பரவியிருக்கலாம்.
- அமைப்பு: வாடிசூக்கஸ் கஸாபி, சுமார் 3.5 முதல் 4 மீட்டர் நீளம்கொண்டது. இதற்கு நீண்ட நீண்ட மூக்கு (long snout) மற்றும் மீன்கள், ஆமைகளைப் பிடிப்பதற்கான கூர்மையான பற்கள் இருந்துள்ளன. நவீன முதலைகளைப் போல் இது ஆறுகள் மற்றும் சதுப்பு நிலங்களில் வாழாமல் கடலோரப் பகுதிகளிலும் ஆழமற்ற கடல்களிலும் வாழ்ந்துள்ளது.
ஆரம்பத்தில் கடல் முதலைகளின் பரிணாமம் டைனோசர்கள் அழிவுக்குப் பிறகுதான் தொடங்கியது என்று விஞ்ஞானிகள் நம்பினர். ஆனால், இந்தக் கண்டுபிடிப்பு, டைனோசர்கள் அழிவதற்கு வெகு காலத்திற்கு முன்பே ஆப்பிரிக்காவில் கடல் முதலைகள் இருந்தன என்பதைக் காட்டுகிறது. இந்தப் புதிய சான்றுகள் டைனோசர்கள் அழிந்த பிறகும் ஊர்வன (reptiles) எவ்வாறு உயிர் பிழைத்து, பரவின என்பதைப் புரிந்துகொள்ள முக்கியப் பங்காற்றுகிறது.