டாடா அட்வான்ஸ்டு சிஸ்டம்ஸ் (TASL) மற்றும் பிரான்ஸின் ஏர்பஸ் (Airbus) நிறுவனம் இணைந்து அமைத்துள்ள இந்தத் தொழிற்சாலையில் உலகப்புகழ் பெற்ற H125 ரக ஹெலிகாப்டர்கள் தயாரிக்கப்பட உள்ளன. எவரெஸ்ட் சிகரத்தின் உச்சிக்கே (சுமார் 29,029 அடி) சென்று தரையிறங்கி சாதனை படைத்த உலகின் ஒரே ஹெலிகாப்டர் மாடல் இது என்பது இதன் தனிச்சிறப்பு. “இந்தியாவிலேயே தயாரிக்கப்படும் இந்த ஹெலிகாப்டர்கள் நமது இமயமலைப் பகுதிகளில் ராணுவப் பணிகளுக்காகவும், பேரிடர் மீட்பு மற்றும் சுற்றுலாத் துறையிலும் ஒரு புரட்சியை ஏற்படுத்தும்” என்று பிரதமர் மோடி பெருமிதத்துடன் தெரிவித்தார்.
இந்த H125 ஹெலிகாப்டர் ‘ஹாட் அண்ட் ஹை’ (Hot and High) எனப்படும் கடும் வெப்பம் மற்றும் மிக உயரமான மலைப் பிரதேசங்களில் எவ்விதத் தடையுமின்றி இயங்கும் திறன் கொண்டது. இதில் பொருத்தப்பட்டுள்ள ‘சாப்ரான் ஏரியல் 2டி’ (Safran Arriel 2D) எஞ்சின், கடும் குளிரிலும் எஞ்சினை எளிதாகத் தொடங்கவும், அதிக எடையைச் சுமந்து செல்லவும் வழிவகை செய்கிறது. இதன் சிவில் (Civil) வடிவத்துடன் சேர்த்து, இதன் ராணுவ வடிவமான H125M ரகமும் இங்குத் தயாரிக்கப்பட உள்ளது. இது இந்திய ராணுவம் தற்போது பயன்படுத்தி வரும் சீட்டா மற்றும் சேடக் ஹெலிகாப்டர்களுக்குச் சிறந்த மாற்றாக அமையும் என எதிர்பார்க்கப்படுகிறது.
இந்தத் தொழிற்சாலை ஆண்டுக்கு 10 ஹெலிகாப்டர்களைத் தயாரிக்கும் திறனுடன் தொடங்கப்பட்டுள்ளது. தேவைக்கேற்ப இந்த எண்ணிக்கை அதிகரிக்கப்படும். இந்தியாவில் தயாரிக்கப்படும் முதல் H125 ஹெலிகாப்டர் 2027-ம் ஆண்டின் தொடக்கத்தில் பயன்பாட்டிற்கு வரும் என்று டாடா நிறுவனம் அறிவித்துள்ளது. இந்தத் திட்டத்திற்காக சுமார் 37 இந்திய விநியோகஸ்தர்கள் (Suppliers) ஒப்பந்தம் செய்யப்பட்டுள்ளனர், இதன் மூலம் 70 சதவீத உதிரிபாகங்கள் இந்தியாவிலேயே தயாரிக்கப்பட்டு ‘ஆத்மநிர்பர் பாரத்’ திட்டத்திற்குப் பெரும் வலு சேர்க்கும். மேலும், இங்கிருந்து அண்டை நாடுகளுக்கும் ஹெலிகாப்டர்கள் ஏற்றுமதி செய்யப்பட உள்ளன.
இந்தக் கூட்டமைப்பு மூலம் சுமார் 10,000 பேருக்கு வேலைவாய்ப்பு கிடைக்கும் என்றும், கர்நாடகா மாநிலம் இந்தியாவின் ஏரோஸ்பேஸ் மையமாக மாறும் என்றும் பொருளாதார வல்லுநர்கள் கணித்துள்ளனர். அவசர மருத்துவச் சேவை (EMS), சட்ட அமலாக்கம், தீயணைப்பு மற்றும் வான்வழிச் சுற்றுலா போன்ற துறைகளில் இனி தனியார் நிறுவனங்களும் இந்த மேட்-இன்-இந்தியா ஹெலிகாப்டர்களைப் பயன்படுத்த முடியும். பாதுகாப்பு மற்றும் தொழில்நுட்பத் துறையில் இந்தியா-பிரான்ஸ் இடையிலான 60 ஆண்டுகால உறவில் இது ஒரு புதிய மைல்கல்லாகக் கருதப்படுகிறது.
