சிரியாவின் வடகிழக்குப் பகுதியில் அமைந்துள்ள மூலோபாய முக்கியத்துவம் வாய்ந்த ‘அல்-ஷதாதி’ (al-Shaddadi) ராணுவ தளத்திலிருந்து அமெரிக்கப் படைகள் முழுமையாக வெளியேறியுள்ளன. இதனைத் தொடர்ந்து, அந்த ராணுவ தளத்தை சிரியா ராணுவம் இன்று (பெப்ரவரி 15) தனது கட்டுப்பாட்டுக்குள் கொண்டுவந்துள்ளது. அமெரிக்கத் தரப்புடன் மேற்கொள்ளப்பட்ட முறையான ஒருங்கிணைப்பின் அடிப்படையில் இந்த ராணுவ தளக் கைமாற்றம் நடந்துள்ளதாக சிரியப் பாதுகாப்பு அமைச்சகம் அதிகாரப்பூர்வமாக அறிவித்துள்ளது. ஐஎஸ் பயங்கரவாதிகளுக்கு எதிரான போரில் கடந்த 2016-ஆம் ஆண்டு முதல் இந்த தளம் அமெரிக்கப் படைகளின் முக்கிய மையமாகத் திகழ்ந்தது குறிப்பிடத்தக்கது.
இந்த ராணுவ தளக் கைமாற்றம், சிரிய அரசு மற்றும் குர்திஷ் தலைமையிலான சிரிய ஜனநாயகப் படைகளுக்கு (SDF) இடையே எட்டப்பட்ட போர்நிறுத்த ஒப்பந்தத்தின் ஒரு முக்கிய பகுதியாகும். முன்னதாக, கடந்த வியாழக்கிழமை ஜோர்டான் மற்றும் ஈராக் எல்லைக்கு அருகிலுள்ள மற்றுமொரு முக்கிய தளமான ‘அல்-தன்ப்’ (al-Tanf) தளத்தையும் அமெரிக்கப் படைகள் காலி செய்தன. சிரியாவின் இறையாண்மையை மீண்டும் நிலைநிறுத்துவதற்கான ஒரு முக்கிய படியாக இந்த நகர்வு பார்க்கப்படுகிறது. அமெரிக்காவின் இந்தத் திடீர் பின்வாங்கலானது பிராந்தியத்தில் அதிகார சமநிலையை மாற்றியமைத்துள்ளது.
இது குறித்து கருத்து தெரிவித்துள்ள அமெரிக்க வெளியுறவுத்துறை அமைச்சர் மார்கோ ரூபியோ, சிரியாவில் போர்நிறுத்த ஒப்பந்தத்தைச் செயல்படுத்துவது நேர்மறையான திசையை நோக்கிச் செல்வதாகக் குறிப்பிட்டுள்ளார். சிரியா எட்டு துண்டுகளாக உடைந்து போர் மற்றும் பெரும் இடப்பெயர்வுகள் ஏற்படுவதை விட, இந்த ஒப்பந்தம் சிறந்த முடிவைத் தரும் என அமெரிக்கா நம்புகிறது. மேலும், பெடூயின்கள் மற்றும் அலவைட் சமூகத்தினருடனும் இதே போன்ற அமைதி ஒப்பந்தங்களை எட்டுவது அவசியம் என்றும் அவர் வலியுறுத்தியுள்ளார். சிரிய அரசுடன் நேரடியாகப் பங்காளியாகச் செயல்படும் அமெரிக்காவின் புதிய வியூகத்தின் ஒரு பகுதியாகவே இது பார்க்கப்படுகிறது.
கடந்த சில மாதங்களாகவே சிரியாவில் தனது ராணுவப் பிரசன்னத்தை அமெரிக்கா படிப்படியாகக் குறைத்து வருகிறது. கடந்த ஜூலை மாதம் சுமார் 1,500 ஆக இருந்த அமெரிக்க வீரர்களின் எண்ணிக்கை, தற்போது 900-க்கும் குறைவாகக் குறைக்கப்பட்டுள்ளது. இதேவேளை, அல்-ஷதாதி பகுதியில் உள்ள தடுப்பு முகாம்களில் வைக்கப்பட்டிருந்த சுமார் 7,000 ஐஎஸ் கைதிகள் ஈராக்கிற்கு இடமாற்றம் செய்யப்பட்டுள்ளனர். இந்த ராணுவத் தளம் தற்போது சிரிய ராணுவத்தின் கைக்குச் சென்றுள்ளதால், அந்தப் பகுதியில் உள்ள எண்ணெய் கிணறுகளின் பாதுகாப்பு மற்றும் நிர்வாகப் பொறுப்புகளும் இனி சிரிய அரசின் கீழ் வரும் என்று எதிர்பார்க்கப்படுகிறது.
