அமெரிக்க அதிபர் டொனால்ட் ட்ரம்ப் இன்று (ஏப்ரல் 1, 2026) ராய்ட்டர்ஸ் செய்தி நிறுவனத்திற்கு அளித்த பிரத்யேகப் பேட்டியில், ஈரான் உடனான போரை அமெரிக்கா மிக விரைவில் முடிவுக்குக் கொண்டு வரும் என்று தெரிவித்துள்ளார். “நாங்கள் ஈரானில் இருந்து மிக விரைவாக வெளியேறுவோம் (out of Iran pretty quickly). எங்களின் முக்கிய இலக்குகளை ஏற்கனவே எட்டிவிட்டோம்” என்று அவர் குறிப்பிட்டுள்ளார். அமெரிக்க ராணுவம் அங்கிருந்து வெளியேறினாலும், ஈரான் தனது போக்கினை மாற்றிக்கொள்ளாவிட்டால் அவ்வப்போது ‘ஸ்பாட் ஹிட்’ (Spot Hits) எனப்படும் குறிப்பிட்ட இலக்குகள் மீதான துல்லியமான தாக்குதல்களை நடத்தத் தயங்க மாட்டோம் என்றும் அவர் எச்சரித்துள்ளார்.
சுமார் ஐந்து வாரங்களாக நீடித்து வரும் இந்தப் போரில், ஈரானின் அணுசக்தித் திறனை அமெரிக்கா முழுமையாக முடக்கிவிட்டதாக ட்ரம்ப் உரிமை கோரியுள்ளார். “ஈரான் இனி அணு ஆயுதங்களை உருவாக்க முடியாது; அந்தப்Regime-ஐ நாங்கள் செயலிழக்கச் செய்துவிட்டோம். எனவே, ஒரு பெரிய ராணுவக் குழுவை அங்கு நிலைநிறுத்த வேண்டிய அவசியம் இனி இல்லை” என்று அவர் கூறியுள்ளார். அடுத்த இரண்டு அல்லது மூன்று வாரங்களில் ராணுவ நடவடிக்கைகள் படிப்படியாகக் குறைக்கப்படும் என எதிர்பார்க்கப்படுகிறது. இருப்பினும், ஹார்முஸ் ஜலசந்தியை (Strait of Hormuz) ஈரான் திறக்கும் வரை முழுமையான போர் நிறுத்தம் இருக்காது என்பதையும் அவர் உறுதிப்படுத்தியுள்ளார்.
இந்தப் பேட்டியில் ட்ரம்ப் நேட்டோ (NATO) அமைப்பு குறித்தும் தனது அதிருப்தியை வெளிப்படுத்தியுள்ளார். ஈரானுடனான மோதலில் அமெரிக்காவிற்கு ஆதரவாக நிற்காத நேட்டோ நாடுகளை அவர் கடுமையாகச் சாடியுள்ளார். “நேட்டோ என்பது ஒருதலைப்பட்சமான ஒன்றாக மாறிவிட்டது. எங்களுக்குத் தேவைப்படும் போது அவர்கள் உதவவில்லை” என்று கூறிய அவர், அமெரிக்கா நேட்டோ அமைப்பிலிருந்து வெளியேறுவது குறித்து “நிச்சயமாக” ஆலோசித்து வருவதாகத் தெரிவித்துள்ளார். இது சர்வதேசப் பாதுகாப்பு ஒப்பந்தங்களில் ஒரு மிகப்பெரிய மாற்றத்தை ஏற்படுத்தும் என அஞ்சப்படுகிறது.
அமெரிக்காவின் இந்தத் திடீர் பின்வாங்கலுக்குப் பின்னால் உலகளாவிய எரிசக்தி நெருக்கடி மற்றும் பெட்ரோல் விலை உயர்வு ஒரு முக்கிய காரணமாகப் பார்க்கப்படுகிறது. அமெரிக்காவில் ஒரு கேலன் பெட்ரோல் விலை 4 டாலரைத் தாண்டியுள்ள நிலையில், நவம்பர் மாதம் நடைபெறவுள்ள இடைத்தேர்தலை (Midterm Elections) கருத்தில் கொண்டு ட்ரம்ப் இந்த முடிவை எடுத்துள்ளதாக அரசியல் விமர்சகர்கள் கருதுகின்றனர். இன்று இரவு 9 மணிக்கு (அமெரிக்க நேரம்) ட்ரம்ப் நாட்டு மக்களிடம் உரையாற்றவுள்ளார். அதில் ஈரானில் இருந்தான வெளியேற்றம் மற்றும் நேட்டோ விவகாரம் குறித்து மேலும் பல முக்கிய அறிவிப்புகள் வெளியாகலாம்.
