வியட்நாம் நாட்டின் ஃபூ குவோக் (Phu Quoc) தீவு அருகே 32 இந்தியச் சுற்றுலாப் பயணிகள் மற்றும் 4 ஊழியர்கள் என மொத்தம் 36 பேருடன் சென்ற சுற்றுலாப் படகு நடுக்கடலில் கவிழ்ந்து விபத்துக்குள்ளானதில் 15 இந்தியர்கள் பலியாகியுள்ளனர். இந்தத் துயரச் சம்பவத்தில் விபத்துக்குள்ளான படகில் பயணித்தவர்களில் 20-க்கும் மேற்பட்டோர் தமிழர்கள் என்ற அதிர்ச்சித் தகவல் தற்பொழுது வெளியாகியுள்ளது. இதனைத் தொடர்ந்து, விபத்தில் சிக்கிய தமிழர்களின் நிலை குறித்து அறியவும், அவர்களது குடும்பத்தினருக்கு உதவவும் தமிழ்நாடு அரசின் அயலகத் தமிழர் நலத்துறை சார்பில் அவசரக் கட்டுப்பாட்டு அறை மற்றும் பிரத்யேக உதவி எண்கள் தற்பொழுது அறிவிக்கப்பட்டுள்ளன.
தமிழ்நாடு அரசின் அறிவிப்பின்படி, வியட்நாம் படகு விபத்து குறித்துத் தகவல்களை அறிய இந்தியாவிற்குள் இருக்கும் உறவினர்கள் 1800 309 3793 என்ற கட்டணமில்லா (Toll-Free) உதவி எண்ணைத் தொடர்பு கொள்ளலாம். மேலும், வெளிநாடுகளில் இருந்து விபத்து குறித்த விவரங்களைப் பெற விரும்புவோர் +91 80 6900 9900 என்ற சர்வதேச தொலைபேசி எண்ணிற்கு மிஸ்டு கால் (Missed Call) கொடுக்கலாம் என்று தெரிவிக்கப்பட்டுள்ளது. இதுதவிர, ஹோ சி மின் நகரில் உள்ள இந்தியத் தூதரகமும் அவசர உதவி எண்களை (+84 36 281 7930, +84 91 552 3714) வெளியிட்டு மீட்புப் பணிகளைத் தீவிரமாக ஒருங்கிணைத்து வருகிறது.
இவ்விபத்தில் பலியான 15 இந்தியர்களில், தமிழ்நாட்டின் திண்டுக்கல் மாவட்டம் பழனியைச் சேர்ந்த முருகபிரபு (44) என்பவரது உடல் அடையாளம் காணப்பட்டுள்ளது பெரும் சோகத்தை ஏற்படுத்தியுள்ளது. முருகபிரபு மற்றும் அவரது நண்பரான நிர்மல்குமார் ஆகிய இருவரும் பழனியில் ‘லாவா’ (Lava) மொபைல் நிறுவனத்தின் அதிகாரப்பூர்வ விநியோகஸ்தர்களாகப் (Distributors) பணியாற்றி வந்துள்ளனர். வணிகத்தில் சிறப்பாகச் செயல்பட்டதற்காக சம்பந்தப்பட்ட மொபைல் நிறுவனம் இவர்களை வியட்நாமிற்குச் சுற்றுலா அனுப்பி வைத்திருந்த வேளையில், இந்த அகோர விபத்து நிகழ்ந்துள்ளது. முருகபிரபுவின் உடல் மீட்கப்பட்டுள்ள நிலையில், அவருடன் சென்ற நண்பர் நிர்மல்குமார் பத்திரமாக மீட்கப்பட்டுள்ளதாகத் தெரிகிறது. திருச்சியைச் சேர்ந்த அழகுமுத்து என்பவரும் இந்த விபத்தில் பலியாகியுள்ளார்.
படகில் பயணித்த எஞ்சிய தமிழர்கள் மற்றும் ஆந்திரா, தெலுங்கானா, மகாராஷ்டிரா உள்ளிட்ட இதர மாநிலங்களைச் சேர்ந்த பயணிகளின் தற்போதைய நிலவரம் குறித்த அதிகாரப்பூர்வ பட்டியலைத் தயாரிக்கும் பணிகளில் இந்தியத் தூதரக அதிகாரிகள் தீவிரமாக ஈடுபட்டுள்ளனர். விபத்தில் பலியானோரின் குடும்பத்தினருக்குப் பிரதமர் நரேந்திர மோடி மற்றும் லாவா மொபைல் நிறுவனம் தங்களது ஆழமான இரங்கல்களைத் தெரிவித்துள்ளனர். உயிரிழந்த முருகபிரபுவின் உடலைச் சொந்த ஊரான பழனிக்கு விரைந்து கொண்டு வருவதற்கான அனைத்துத் துரித நடவடிக்கைகளையும் மத்திய, மாநில அரசுகள் தற்பொழுது மேற்கொண்டு வருகின்றன.
