அமெரிக்கா மற்றும் இஸ்ரேல் கூட்டுப் படைகளின் வான்வழித் தாக்குதலில் கொல்லப்பட்ட ஈரானின் முன்னாள் உச்ச தலைவர் ஆயதுல்லா அலி கமேனியின் உடல், பல மாதங்களுக்குப் பிறகு ஈரானின் புனித நகரமான மஷாத்தில் தற்பொழுது அடக்கம் செய்யப்பட்டுள்ளது. கடந்த பிப்ரவரி 28-ஆம் தேதி அமெரிக்கா-இஸ்ரேல் நடத்திய ஏவுகணைத் தாக்குதலில் கமேனி கொல்லப்பட்ட நிலையில், ஒரு வார காலமாக ஈரான் மற்றும் ஈராக் நாடுகளில் நடைபெற்ற வரலாற்றுச் சிறப்புமிக்க இறுதி ஊர்வலங்களின் முடிவில் அவரது உடல் அடக்கம் செய்யப்பட்டது. இந்த இறுதிச்சடங்கு நிகழ்வின் போது, ஈரானின் புதிய உச்ச தலைவராகப் பொறுப்பேற்றுள்ள அவரது மகன் ஆயதுல்லா மொஜ்தபா கமேனி, தங்களது முந்தைய தலைவரின் மரணத்திற்கு மிக விரைவில் “இரத்தத்திற்கு இரத்தம்” பழிவாங்கப்படும் என்று ஆக்ரோஷமாகச் சபதம் செய்துள்ளார்.
தனது அதிகாரப்பூர்வ டெலிகிராம் (Telegram) பக்கத்தில் விடுத்துள்ள எழுத்துப்பூர்வமான செய்தியில் மொஜ்தபா கமேனி, “எங்கள் தியாகத் தலைவரின் தூய்மையான இரத்தத்திற்கும், இந்த இரண்டு போர்களில் மடிந்த அனைத்து தியாகிகளின் மரணத்திற்கும் காரணமான அந்த அவமானகரமான, குற்றவாளிப் படுகொலையாளர்களிடமிருந்து மிக விரைவில் பழிவாங்குவோம் என உறுதி கூறுகிறோம். இந்த வரலாற்றுப் பழிவாங்கல் என்பது எங்கள் ஒட்டுமொத்த தேசத்தின் மிக முக்கியத் தேவையாகும், இது நிச்சயமாக நிறைவேற்றப்படும்” என்று தெரிவித்துள்ளார். மேலும், இந்த தெய்வீகப் பணியை நிறைவேற்றுவது வெறும் ஈரான் அதிகாரிகளை மட்டும் சார்ந்தது அல்ல என்றும், உலகெங்கிலும் உள்ள சுதந்திர மனிதர்கள் அனைவரும் இதில் தங்களது பங்கை ஆற்றுவார்கள் என்றும் அவர் குறிப்பிட்டுள்ளார்.
அலி கமேனியின் மரணத்திற்குப் பிறகு ஈரானின் புதிய உச்ச தலைவராக மொஜ்தபா கமேனி மார்ச் 8-ஆம் தேதி நியமிக்கப்பட்ட போதிலும், அவர் இதுவரை பொதுவெளியில் நேரடியாகத் தோன்றவில்லை. தந்தையின் இறுதிச்சடங்கு ஊர்வலத்திலும் அவர் நேரில் பங்கேற்காமல், வெறும் எழுத்துப்பூர்வ அறிக்கைகளை மட்டுமே வெளியிட்டு வருவது, அவருக்கும் அதே வான்வழித் தாக்குதலில் கடுமையான முகச்சிதைவு அல்லது காயங்கள் ஏற்பட்டிருக்கலாம் என்ற சந்தேகத்தை சர்வதேச உளவுத்துறையினர் மத்தியில் வலுப்படுத்தியுள்ளது. இருப்பினும், ஈரானின் சக்திவாய்ந்த புரட்சிகர காவல் படை (IRGC) புதிய உச்ச தலைவரின் இந்த பழிவாங்கல் அறிவிப்பிற்கு தங்களது முழுமையான ஆதரவை வழங்கியுள்ளது.
ஈரான் தரப்பிலிருந்து விடுக்கப்பட்டுள்ள இந்த பகிரங்கப் பழிவாங்கல் எச்சரிக்கையானது, ஏற்கனவே தற்காலிகப் போர்நிறுத்தம் முடிவுக்கு வந்துவிட்டதாக அறிவித்துள்ள அமெரிக்க அதிபர் டொனால்ட் டிரம்பின் ‘1,000 ஏவுகணைகள் தயார்’ என்ற அதிரடி எச்சரிக்கைக்குப் பதிலடி கொடுக்கும் வகையில் அமைந்துள்ளது. அமெரிக்க அதிபரைக் குறிவைத்து ஈரான் சதித்திட்டம் தீட்டுவதாக இஸ்ரேல் எச்சரித்துள்ள சூழலில், “படுகொலை செய்த குற்றவாளிகள் படுக்கையில் நிம்மதியாக உயிரை விட முடியாது; அவர்களின் ஆசை கல்லறையோடுதான் போகும்” என ஈரான் புதிய தலைவர் கூறியிருப்பது மத்திய கிழக்கு நாடுகளில் மீண்டும் ஒரு முழு அளவிலான உலகப்போர் வெடிக்கும் அபாயத்தை ஏற்படுத்தியுள்ளது.
