உலக நாடுகளுக்கு இடையே பெரும் ராணுவப் பதற்றத்தை ஏற்படுத்தும் வகையில், சீனா தனது நாட்டின் ஒரு பெரிய பாலைவனப் பகுதியின் நடுவே, அமெரிக்க கடற்படைக்குச் சொந்தமான அதிநவீன போர்க்கப்பலின் அச்சு அசல் 3D மாதிரியை (3D Replica) பிரம்மாண்டமாக உருவாக்கியுள்ளது. அமெரிக்காவின் ‘அர்லீ பர்க்’ (Arleigh Burke-class) ரக ஏவுகணை அழிப்புக் கப்பலை (Destroyer) ஒத்த இந்த 510 அடி நீள மாதிரி, விண்வெளியில் இருந்து எடுக்கப்பட்ட செயற்கைக்கோள் புகைப்படங்கள் மூலம் வெளிச்சத்திற்கு வந்து உலக பாதுகாப்பு நிபுணர்களை அதிர வைத்துள்ளது.
மேக்சார் (Maxar Technologies) நிறுவனத்தின் அதிநவீன செயற்கைக்கோள் கேமராக்கள் மூலம் சின்ஜியாங் மாகாணத்தில் உள்ள தக்லமக்கான் (Taklamakan Desert) பாலைவனப் பகுதியில் இந்த விசித்திர உள்கட்டமைப்பு கண்டறியப்பட்டுள்ளது. வெறும் தட்டையான தரைவழியாக வரைபடமாக மட்டுமில்லாமல், கப்பலின் உயரம், ரேடார் கட்டமைப்புகள் மற்றும் ஆயுதக் கோபுரங்கள் உட்பட அனைத்தும் முப்பரிமாணத்தில் (3D) மிகத் துல்லியமாக வடிவமைக்கப்பட்டுள்ளன. இந்த மாதிரி கப்பல் நகரும் வகையில் பிரம்மாண்ட தண்டவாள அமைப்புகளும் அதன் அருகே நிறுவப்பட்டுள்ளன.
அமெரிக்காவுடன் தைவான் விவகாரம் மற்றும் தென் சீனக் கடல் பகுதியில் மோதல் போக்கு நீடித்து வரும் நிலையில், சீன ராணுவம் (PLA) தனது ஏவுகணைகளின் துல்லியத் தன்மையைச் சோதித்துப் பார்ப்பதற்கான ‘இலக்காக’ (Target) இதனைப் பயன்படுத்த திட்டமிட்டுள்ளது. குறிப்பாக, அமெரிக்காவின் பவர்புல் போர்க்கப்பல்களைக் கண்டறிந்து தாக்கும் அதிவேக ‘ஹைப்பர்சோனிக்’ ஏவுகணை சோதனைகளுக்காகவே இது உருவாக்கப்பட்டுள்ளதாக அமெரிக்க பாதுகாப்புத் தலைமையகமான பென்டகன் வட்டாரங்கள் சந்தேகிக்கின்றன.
கடந்த காலங்களில் அமெரிக்க விமானம் தாங்கி போர்க்கப்பல்களின் (Aircraft Carriers) தட்டையான வடிவங்களைச் சீனா இதே பாலைவனத்தில் உருவாக்கியிருந்த நிலையில், தற்போது மிகத் துல்லியமான 3D போர்க்கப்பல் மாதிரியை உருவாக்கியிருப்பது அதன் ராணுவத் தொழில்நுட்ப வளர்ச்சியை உணர்த்துகிறது. இந்த நவீன இலக்குகள் மூலம் நகரும் அமெரிக்கக் கப்பல்களைத் தங்களின் அதிநவீன ரேடார் அமைப்புகள் எப்படிப் படம் பிடிக்கின்றன என்பதையும் சீனா சோதித்து வருகிறது. இந்த விவகாரம் குறித்துப் பெய்ஜிங்கில் உள்ள சீன அரசு இதுவரை எவ்வித அதிகாரப்பூர்வ விளக்கமும் அளிக்காத நிலையில், சர்வதேச அளவில் வான்வழிப் பாதுகாப்பு மற்றும் கடற்படைப் பதற்றம் மேலும் அதிகரித்துள்ளது.
