மத்திய ஆசிய நாடுகளுக்கான இந்தியாவின் முக்கிய வர்த்தக நுழைவாயிலாகக் கருதப்படும் ஈரானின் மூலோபாயச் சிறப்புமிக்க சாபஹார் (Chabahar) துறைமுகத்தின் மீது அமெரிக்கப் படைகள் நடத்திய அதிபயங்கர வான்வழித் தாக்குதலில், அங்கிருந்த முக்கியக் கண்காணிப்புக் கோபுரம் முற்றிலும் தரைமட்டமாக்கப்பட்டுள்ளது. அமெரிக்க மத்திய கட்டளைத் தலைமையகம் (US CENTCOM) இந்தத் தாக்குதலை அதிகாரப்பூர்வமாக உறுதிப்படுத்தியுள்ளதுடன், கோபுரம் இடிந்து விழும் அன்-கிளாசிஃபைட் வீடியோ காட்சிகளையும் வெளியிட்டுள்ளது. அமெரிக்கா மற்றும் ஈரான் இடையேயான தற்போதைய போர்ப் பதற்றங்களுக்கு மத்தியில், இந்தியாவின் முதலீடுகள் அதிகம் உள்ள ஒரு சர்வதேசப் பகுதியில் இந்தத் தாக்குதல் நடந்துள்ளது உலகளாவிய பொருளாதார மற்றும் அரசியல் வட்டாரங்களில் பெரும் பரபரப்பைக் கிளப்பியுள்ளது.
கடந்த ஜூலை 16 அன்று அமெரிக்கப் படைகளால் வெற்றிகரமாகத் தாக்கப்பட்ட இந்தக் கோபுரம், சாபஹார் துறைமுகத்தின் ‘ஷாஹித் கலாந்தரி’ (Shahid Kalantari) முனையத்தில் அமைந்திருந்த ஒரு முக்கியக் கடல்சார் கண்காணிப்பு மையமாகும். ஹார்முஸ் நீரிணை மற்றும் ஓமன் வளைகுடா வழியாகச் செல்லும் சர்வதேச வணிகக் கப்பல்களைக் கண்காணிப்பதற்கும், அவற்றைக் குறிவைத்துத் தாக்குவதற்கும் ஈரானின் இஸ்லாமிய புரட்சிகர காவல்படை (IRGC) பல தசாப்தங்களாக இந்த வலையமைப்பைப் பயன்படுத்தி வந்ததாக சென்ட்காம் குற்றம் சாட்டியுள்ளது. இந்தத் தாக்குதலின் மூலம் சிவிலியன் கப்பல் ஊழியர்களின் பாதுகாப்பைப் பேணவும், ஈரான் விதித்துள்ள கடல்சார் முற்றுகைகளை உடைக்கவும் வழிவகை செய்யப்பட்டுள்ளதாக அமெரிக்கப் பாதுகாப்புச் செயலர் பீட் ஹெக்செத் தெரிவித்துள்ளார்.
இச்சம்பவம் குறித்துத் தங்களின் ‘மத்திய ஆசிய வர்த்தக நுழைவாயில்’ அழிகிறதோ என்று இந்தியத் தரப்பில் எழுந்த அச்சங்களுக்குப் பதிலளிக்கும் விதமாக, இந்திய வெளியுறவு அமைச்சகத்தின் செய்தித் தொடர்பாளர் ரந்தீர் ஜெய்ஸ்வால் டெல்லியில் அவசர விளக்கமளித்துள்ளார். சாபஹார் துறைமுகத்தில் இரண்டு முக்கிய முனையங்கள் உள்ளன; அதில் அமெரிக்கா தாக்கியுள்ள ‘ஷாஹித் கலாந்தரி’ முனையத்திற்கும், இந்தியா நேரடியாக இயக்கி வரும் ‘ஷாஹித் பெஹெஷ்டி’ (Shahid Beheshti) முனையத்திற்கும் எவ்விதத் தொடர்புமில்லை என்று அவர் தெளிவுபடுத்தியுள்ளார். இந்தியாவின் கட்டுப்பாட்டில் உள்ள முனையத்திற்கும், அங்குள்ள சரக்குக் கையாளுதல் உள்கட்டமைப்புகளுக்கும் எந்தவொரு சேதமும் ஏற்படவில்லை என்று இந்தியா திட்டவட்டமாக அறிவித்துள்ளது.
பாகிஸ்தானைத் தவிர்த்து ஆப்கானிஸ்தான் மற்றும் மத்திய ஆசிய நாடுகளுக்கு நேரடி வர்த்தகப் பாதையை உருவாக்கவும், 7,200 கி.மீ நீளமுள்ள சர்வதேச வட-தெற்கு போக்குவரத்து வழித்தடத்தை (INSTC) வலுப்படுத்தவும் இந்தியா இந்தத் துறைமுகத்தைப் பெரிதும் நம்பியுள்ளது. அமெரிக்காவின் முந்தைய பொருளாதாரத் தடைகளுக்கான விலக்குக் காலம் (Sanctions Waiver) கடந்த ஏப்ரல் மாதத்துடன் முடிவடைந்த நிலையில், சிவிலியன் உள்கட்டமைப்புகள் மீது நடத்தப்படும் இத்தகைய ராணுவத் தாக்குதல்களைத் தவிர்க்க வேண்டும் என்பதே இந்தியாவின் அதிகாரப்பூர்வ நிலைப்பாடாக உள்ளது. ஈரானின் பிற மாகாணங்களிலும் அமெரிக்கா நடத்திய இந்த ஏவுகணைத் தாக்குதல்களில் இதுவரை 38-க்கும் மேற்பட்டோர் பலியாகியுள்ளதாக ஈரான் சுகாதார அமைச்சகம் தெரிவித்துள்ளதால், ஒட்டுமொத்தப் பிராந்தியமும் பதற்றத்தின் உச்சியில் உள்ளது.
