திரையுலகில் இருந்து அரசியலுக்கு வந்து புதிய அத்தியாயத்தைப் படைத்துள்ள தமிழக வெற்றிக் கழகத்தின் (தவெக) தலைவர் விஜய்க்குப் பல்வேறு தரப்பிலிருந்தும் பாராட்டுகள் குவிந்து வருகின்றன. இந்நிலையில, நடிகர் தனுஷ் தனது சமூக வலைதளப் பக்கத்தில் விஜய்யைப் பாராட்டிப் பதிவிட்ட ஒரே ஒரு வாழ்த்து ட்வீட், அவர் தவெகவில் இணையப்போகிறாரோ என்ற புதிய அரசியல் விவாதத்தைச் சமூக வலைதளங்களில் தூண்டிவிட்டுள்ளது.
சமீபத்தில் வெளியிட்ட அந்த வாழ்த்துச் செய்தியில், “களத்துக்கு வந்து போட்டியிட்ட முதல் தேர்தலிலேயே தமிழ்நாட்டு மக்களின் பெரும் ஆதரவையும் அன்பையும் பெற்று ஆட்சியமைக்கவிருக்கும் திரு. விஜய் சார் அவர்களுக்கும் தமிழக வெற்றிக் கழகத்துக்கும் என் மனமார்ந்த வாழ்த்துகள்” என்று தனுஷ் பதிவிட்டிருந்தார். வழக்கமான வாழ்த்துச் செய்தியாக இது இருந்தாலும், அவர் பயன்படுத்திய வார்த்தைப் பிரயோகங்கள் தான் ரசிகர்களின் கவனத்தை ஈர்த்துப் விவாதப் பொருளாக மாறியுள்ளன.
இதைக் கூர்ந்து கவனித்த சினிமா மற்றும் அரசியல் ரசிகர்கள், தனுஷ் பொதுவாக இதுபோன்ற அரசியல் நிகழ்வுகளுக்கு உடனடியாகவோ அல்லது மிக விரிவாகவோ வாழ்த்துத் தெரிவிக்காத நிலையில், தவெகவின் வெற்றியை ‘மக்கள் தந்த பெரு ஆதரவு’ எனக் குறிப்பிட்டுப் பாராட்டியிருப்பதைப் சுட்டிக்காட்டுகின்றனர். மேலும், விஜய்யின் அரசியல் நகர்வுகளுக்கு ஆதரவு அளிக்கும் வகையில் தனுஷின் வாழ்த்து அமைந்திருப்பதாகக் கூறும் ரசிகர்கள், எதிர்காலத்தில் தவெகவின் முக்கியத் தூணாக அல்லது ஆதரவாளராக அவர் அரசியல் மேடைகளில் தோன்றினாலும் ஆச்சரியப்படுவதற்கில்லை எனத் தங்களின் கருத்துக்களைப் பகிர்ந்து வருகின்றனர்.
இருப்பினும், தனுஷ் தரப்பிலிருந்து அவர் அரசியலில் ஈடுபடப்போவது குறித்து எவ்வித அதிகாரப்பூர்வ அறிவிப்பும் வெளிவரவில்லை. மூத்த நடிகர்கள் முதல் இளம் நட்சத்திரங்கள் வரை திரையுலகத்தைச் சேர்ந்த பலரும் விஜய்யின் இந்த வரலாற்றுச் சிறப்புமிக்க வெற்றிக்கு வாழ்த்துத் தெரிவித்து வரும் நிலையில், தனுஷின் வாழ்த்தும் அதன் ஒரு பகுதியே என்றும், இதை வைத்து அவர் கட்சியில் சேர்கிறார் எனக் கூறுவது வெறும் வதந்தியே என்றும் மற்றொரு தரப்பினர் வாதிட்டு வருகின்றனர். எது எப்படியோ, தனுஷின் அந்த ஒரு ட்வீட் இணையத்தில் தற்போது லைக்ஸ்களையும் கமெண்ட்களையும் அள்ளி வருகிறது.
