பாலிவுட்டில் பயங்கரம்! 10 ஆண்டு கால பாலியல் அத்துமீறல்: ‘துரந்தர்’ பட நடிகர் நதீம் கான் அதிரடி கைது!
பாலிவுட் திரையுலகில் வளர்ந்து வரும் நடிகராக அறியப்படுபவர் நதீம் கான். அண்மையில் வெளியாகி ரசிகர்களிடையே பெரும் வரவேற்பைப் பெற்ற ‘துரந்தர்’ (Durandhar) திரைப்படத்தில் முக்கிய கதாபாத்திரத்தில் நடித்ததன் மூலம் இவர் கவனம் பெற்றார். இந்நிலையில், திருமண ஆசை காட்டிப் பெண்ணை ஏமாற்றிய புகாரில் அவர் போலீசாரால் அதிரடியாகக் கைது செய்யப்பட்டுள்ள சம்பவம் திரையுலகினர் மற்றும் ரசிகர்களிடையே பெரும் அதிர்ச்சியை ஏற்படுத்தியுள்ளது.
பாதிக்கப்பட்ட 41 வயதுடைய பெண், மும்பையில் உள்ள பல்வேறு சினிமா பிரபலங்களின் வீடுகளில் வீட்டுப் பணியாளராக வேலை செய்து வருகிறார். இவருக்கும் நடிகர் நதீம் கானுக்கும் கடந்த 2015-ம் ஆண்டு முதல் பழக்கம் ஏற்பட்டுள்ளது. இந்த அறிமுகம் நாளடைவில் நெருக்கமாக மாறிய நிலையில், நதீம் கான் அந்தப் பெண்ணைத் திருமணம் செய்து கொள்வதாக உறுதி அளித்துள்ளார். இதனை நம்பி அந்தப் பெண்ணும் நதீமுடன் பழகி வந்துள்ளார்.
கடந்த 10 ஆண்டுகளாகத் தன்னைத் திருமணம் செய்துகொள்வதாகக் கூறி நம்ப வைத்து, நதீம் கான் தன்னை பாலியல் ரீதியாகத் துன்புறுத்தி வந்ததாக அந்தப் பெண் தனது புகாரில் உருக்கமாகத் தெரிவித்துள்ளார். சமீபகாலமாகத் திருமணத்தைப் பற்றிப் பேசும்போதெல்லாம் நதீம் கான் மழுப்பலாகப் பதிலளித்ததோடு, தற்போது அந்தப் பெண்ணைத் திருமணம் செய்ய முற்றிலும் மறுத்துவிட்டதாகக் கூறப்படுகிறது. இதனால் தான் ஏமாற்றப்பட்டதை உணர்ந்த அந்தப் பெண், காவல் நிலையத்தில் தஞ்சம் புகுந்தார்.
பாதிக்கப்பட்ட பெண்ணின் புகாரைப் பெற்றுக் கொண்ட காவல்துறையினர், நடிகர் நதீம் கான் மீது பல்வேறு பிரிவுகளின் கீழ் வழக்குப் பதிவு செய்தனர். முதற்கட்ட விசாரணையில் அந்தப் பெண்ணுக்கும் நதீமுக்கும் இடையே நீண்ட காலத் தொடர்பு இருந்தது உறுதி செய்யப்பட்டது. இதனைத் தொடர்ந்து, தலைமறைவாக இருந்த நதீம் கானை போலீசார் சுற்றி வளைத்துக் கைது செய்தனர். தற்போது அவர் நீதிமன்றக் காவலில் வைக்கப்பட்டு தீவிர விசாரணைக்கு உட்படுத்தப்பட்டுள்ளார்.
சினிமா வாய்ப்புகள் பெருகி வரும் நேரத்தில், ஒரு பாலியல் குற்றச்சாட்டில் சிக்கி நடிகர் நதீம் கான் கைதாகி இருப்பது பாலிவுட் வட்டாரத்தில் பேசுபொருளாகியுள்ளது. புகழ்பெற்ற நடிகர்களின் வீடுகளில் பணியாற்றும் ஒரு பெண்ணுக்கே இந்த நிலைமையா எனப் பலரும் சமூக வலைதளங்களில் கேள்வி எழுப்பி வருகின்றனர். இந்த விவகாரத்தில் நதீம் கானுக்குப் பின்னால் வேறு ஏதேனும் மிரட்டல்கள் இருந்ததா என்பது குறித்தும் போலீசார் விசாரித்து வருகின்றனர்.
