அமெரிக்காவின் டெக்சாஸ் மாகாணத்தில் உள்ள ‘கால்வெஸ்டன் ஐலேண்ட் ஹிஸ்டாரிக் பிளஷர் பியர்’ (Galveston Island Historic Pleasure Pier) பொழுதுபோக்குப் பூங்காவில், இயங்கிக் கொண்டிருந்த ராட்சத ரோலர் கோஸ்டர் (Iron Shark Roller Coaster) திடீரென நடுவழியில் பழுதடைந்து நின்றதால், அதில் பயணித்த மாணவர்கள் 100 அடி உயரத்தில் 4 மணி நேரம் தலைகீழாகத் தொங்கிய சம்பவம் பெரும் பரபரப்பை ஏற்படுத்தியுள்ளது.
பூங்காவில் உள்ள கடல் பரப்பிற்கு மேலே 100 அடி உயரத்தில் செங்குத்தாகச் செல்லும் ரோலர் கோஸ்டர் பாதையில் வாகனம் மேலே ஏறிக்கொண்டிருந்த போது, திடீரென ஏற்பட்ட தொழில்நுட்பக் கோளாறால் அதன் அவசர காலத் தடை (Emergency Brake) தானாகவே இயங்கி வாகனம் அப்படியே நின்றுபோனது. இதனால் அதில் அமர்ந்திருந்த 8 உயர்நிலைப் பள்ளி மாணவர்கள், சுட்டெரிக்கும் வெயிலில் செங்குத்தான பாதையில் உயரே தொங்கியபடி கத்திக் கூச்சலிட்டனர்.
தகவலறிந்து சம்பவ இடத்திற்கு விரைந்து வந்த உள்ளூர் தீயணைப்பு மற்றும் மீட்புப் படையினர், ராட்சத ஏணி வாகனங்களைப் பயன்படுத்தி 100 அடி உயரத்திற்கு ஏணிகளை நீட்டி மீட்பு நடவடிக்கையில் ஈடுபட்டனர். ஒவ்வொரு மாணவருக்கும் பாதுகாப்பு உடைகள் (Harness) பொருத்தப்பட்டு, தீயணைப்பு வீரர்களின் உதவியுடன் 4 மணி நேரப் போராட்டத்திற்குப் பிறகு அனைவரும் பாதுகாப்பாகக் கீழே இறக்கப்பட்டனர்.
சுட்டெரிக்கும் வெயிலிலும், உயரத்தின் அச்சத்திலும் சிக்கித் தவித்த போதிலும் மாணவர்கள் யாருக்கும் பலத்த காயங்கள் எதுவும் ஏற்படவில்லை என்றும், நீரிழப்பு (Dehydration) பரிசோதனைக்குப் பின் அனைவரும் குடும்பத்தினருடன் அனுப்பி வைக்கப்பட்டதாகவும் அதிகாரிகள் தெரிவித்தனர். இச்சம்பவத்தைத் தொடர்ந்து சம்பந்தப்பட்ட ரோலர் கோஸ்டர் சேவை உடனடியாக நிறுத்தப்பட்டு, விரிவான தொழில்நுட்ப ஆய்வு நடத்தப்பட்டு வருவதாகப் பூங்கா நிர்வாகம் அறிவித்துள்ளது.
