சர்வதேசச் சந்தையில் கச்சா எண்ணெய் விலை பீப்பாய் ஒன்றுக்கு 98 டாலராக அதிரடியாகச் சரிந்துள்ளது. சவூதி அரேபியா தனது மிக முக்கியக் கச்சா எண்ணெய் விநியோகப் பாதையான ‘ஈஸ்ட்-வெஸ்ட்’ (East-West Oil Pipeline) குழாய் இணைப்பை மீண்டும் வெற்றிகரமாக இயக்கி விநியோகத்தைத் தொடங்கியதை அடுத்து, உலகச் சந்தையில் நிலவிய எண்ணெய் தட்டுப்பாடு குறித்த அச்சம் தணிந்து விலை குறையத் தொடங்கியுள்ளது.
செங்கடலில் ஹவுதி கிளர்ச்சியாளர்களின் தொடர் தாக்குதல்கள் மற்றும் வளைகுடாப் பகுதியில் நிலவிய போர் பதற்றங்கள் காரணமாக, பாப் எல்-மண்டேப் ஜலசந்தி வழியிலான கப்பல் போக்குவரத்து பெருமளவில் பாதிக்கப்பட்டிருந்தது. இதனால் பாரசீக வளைகுடாவில் இருந்து எண்ணெய் ஏற்றுமதி தடைபடும் அபாயம் ஏற்பட்ட சூழலில், சவூதி அரேபிய அரசு தனது ஈஸ்ட்-வெஸ்ட் குழாய் இணைப்பை முழு வீச்சில் இயக்கிச் செங்கடல் துறைமுகமான யான்புவுக்குக் கச்சா எண்ணெய்யை மாற்றுப் பாதையில் பாதுகாப்பாகக் கொண்டு செல்ல நடவடிக்கை எடுத்தது.
சவூதி அரேபியா மேற்கொண்டுள்ள இந்தச் மூலோபாய நடவடிக்கை காரணமாக உலகச் சந்தைக்குத் தேவையான கச்சா எண்ணெய் விநியோகம் தடையின்றிச் சென்றடைவது உறுதி செய்யப்பட்டுள்ளது. சர்வதேசச் சந்தையில் கச்சா எண்ணெய் விலை முன்னதாக 100 டாலரைக் கடந்து உயர்ந்து வந்த நிலையில், சவூதியின் விநியோக விரிவாக்க அறிவிப்பைத் தொடர்ந்து பிரெண்ட் (Brent) ரகக் கச்சா எண்ணெய் விலை 98 டாலராகக் குறைந்து முதலீட்டாளர்களுக்கு நிம்மதி அளித்துள்ளது.
நாட்களுக்கு 50 லட்சம் பீப்பாய்களுக்கும் அதிகமான கச்சா எண்ணெய்யைக் கொண்டு செல்லும் திறன் கொண்ட இந்த ஈஸ்ட்-வெஸ்ட் குழாய்ப் பாதை மீண்டும் செயல்படத் தொடங்கியுள்ளது, சர்வதேச அளவில் எரிபொருள் விலையேற்றத்தைக் கட்டுப்படுத்த உதவும் எனப் பொருளாதார நிபுணர்கள் கருதுகின்றனர். அதேவேளையில், ஓபெக் பிளஸ் (OPEC+) அமைப்பின் உற்பத்தி முடிவுகள் மற்றும் சர்வதேசச் சந்தையின் தேவையைப் பொறுத்து வரும் நாட்களில் கச்சா எண்ணெய் விலையில் மேலும் மாற்றங்கள் ஏற்படும் என எதிர்பார்க்கப்படுகிறது.
