தாராபுரம் சட்டமன்ற இடைத்தேர்தல் பிரச்சாரக் களம் இறுதிக்கட்டத்தை எட்டியுள்ள நிலையில், திமுக அமைச்சர் கே.என்.நேரு பிரச்சாரத்தின் போது நடந்த சம்பவம் ஒன்று இணையத்தில் பரவி வருகிறது. தாராபுரத்தில் திமுக வேட்பாளரை ஆதரித்து கே.என்.நேரு தனது வாகனத்தில் தீவிர பிரச்சாரம் மேற்கொண்டு வந்தார். அப்போது அவரை வழியனுப்பவும் வாழ்த்து தெரிவிக்கவும் திமுக தொண்டர்கள் மற்றும் பொதுமக்கள் அவரது வாகனத்தை நாலாபுறமும் சூழ்ந்துகொண்டனர்.
வாகனம் மேற்கொண்டு நகர முடியாத அளவுக்குக் கூட்டம் அதிகரித்ததால், அமைச்சர் கே.என்.நேரு கோபமடைந்ததாகக் கூறப்படுகிறது. வாகனத்திற்கு அருகில் திரண்டு நின்ற தொண்டர்களை நோக்கி அவர் கையை ஓங்கி தள்ளியும் தாக்கியும் வழி ஏற்படுத்த முயன்ற காட்சிகள் வீடியோவில் பதிவாகியுள்ளன. அமைச்சர் தொண்டர்களிடம் ஆவேசமாக நடந்து கொண்ட இந்த வீடியோ காட்சிகள் தற்போது சமூக வலைதளங்களில் வைரலாகி விவாதத்தை ஏற்படுத்தியுள்ளன.
அரசியல் களத்தில் பிரச்சார வாகனத்தை வழிமறிக்கும் வகையிலான கூட்ட நெரிசல்கள் இயல்பானவை என்றாலும், மக்கள் பிரதிநிதிகள் அமைதி காக்க வேண்டும் என எதிர்க்கட்சியினர் விமர்சித்து வருகின்றனர். அதேவேளையில், பாதுகாப்புக் கருதியும் வாகனத்தை இயக்குவதற்காகவுமே அமைச்சர் கூட்டத்தைக் விலக்க முயன்றார் என கட்சித் தொண்டர்கள் தரப்பில் தெரிவிக்கப்படுகிறது.
தாராபுரம் தொகுதியில் பிரச்சாரம் நிறைவடையும் தருவாயில் உள்ள நிலையில், அனைத்துக் கட்சியினரும் தீவிர வாக்கு சேகரிப்பில் ஈடுபட்டுள்ளனர். தேர்தல் ஆணையம் அப்பகுதியில் பாதுகாப்பை பலப்படுத்தியுள்ள சூழலில், இச்சம்பவம் தொடர்பான காணொளி தேர்தல் கவனிப்பாளர்கள் இடையேயும் பேசுபொருளாக மாறியுள்ளது.
