பிரிட்டன் நிதியமைச்சர் ரேச்சல் ரீவ்ஸ் தலைமையிலான நிதிநிலை அறிக்கையில், வருமான வரி விலக்கு வரம்புகளை உயர்த்துவதில்லை என்றும், பழைய வரம்புகளையே நீட்டிப்பது என்றும் தீர்மானிக்கப்பட்டது. இதன் காரணமாக ஊதிய உயர்வு பெறும் ஊழியர்கள் பணவீக்க விகிதத்திற்கு ஏற்பப் பயன்பெற முடியாமல், தானாகவே அதிக வரிப் பிரிவுக்குள் தள்ளப்படும் ‘பிஸ்கல் டிராக்’ (Fiscal Drag) என்னும் மறைமுக வரிச் சுமைக்கு ஆளாகியுள்ளனர். இதனால் அரசுக்கு சுமார் 9 பில்லியன் பவுண்டுகள் வரை கூடுதல் வரி வருவாய் கிடைக்கும் என நிதியியல் ஆய்வு நிறுவனம் (IFS) கணித்துள்ளது.
முந்தைய கன்சர்வேடிவ் ஆட்சிக் காலத்தில் கொண்டுவரப்பட்ட இந்த வரி வரம்பு முடக்கக் கொள்கையை, தற்போதைய லேபர் கட்சி அரசும் தொடர்ந்து நீட்டித்து வருவது பொதுமக்கள் மற்றும் உழைப்பாளர்கள் மத்தியில் அதிர்ச்சியை ஏற்படுத்தியுள்ளது. பணவீக்கம் அதிகரித்து வரும் சூழலில், சாமானிய உழைப்பாளர்களின் உண்மையான வருமானம் குறையும் வகையில் இந்த மறைமுக வரிக் கொள்கை அமைந்துள்ளதாகப் பொருளாதார வல்லுநர்கள் சுட்டிக்காட்டுகின்றனர்.
அரசாங்கத்தின் இந்த முடிவுக்கு எதிர்க்கட்சிகளும் தொழற்சங்கங்களும் கடும் எதிர்ப்புத் தெரிவித்து வருகின்றன. நாட்டின் பொருளாதார நிதிப் பற்றாக்குறையைச் சமாளிக்கவும், பொதுச் சேவைகளுக்கான நிதி ஆதாரத்தைப் பெருக்கவும் இத்தகைய நடவடிக்கைகள் அவசியமாக இருப்பதாக அரசுத் தரப்பில் விளக்கமளிக்கப்பட்டுள்ளது.
இந்த மறைமுக வரி அமலாக்கம் பிரிட்டன் பொருளாதாரத்தில் ஏற்படுத்தும் பாதிப்புகள் மற்றும் சாமானிய மக்களின் நுகர்வுத் திறன் குறித்து நிதி அமைச்சகம் தொடர்ந்து கண்காணித்து வருகிறது. வரவிருக்கும் காலங்களில் இது தொடர்பான கூடுதல் சீர்திருத்தங்கள் குறித்த விவாதங்கள் நாடாளுமன்றத்தில் தொடரும் எனக் எதிர்பார்க்கப்படுகிறது.
