சென்னை மற்றும் அதன் சுற்றுவட்டாரப் பகுதிகளில் உள்ள ஆண்ட்ராய்டு மற்றும் ஐபோன் பயனர்களின் கருவிகளில் ஞாயிற்றுக்கிழமை திடீரென பலத்த சத்தத்துடன் கூடிய அவசர கால எச்சரிக்கைச் செய்தி வந்தது. தேசிய பேரிடர் மேலாண்மை ஆணையம் (NDMA) மற்றும் தொலைத்தொடர்புத்துறை இணைந்து மேற்கொண்ட செல் ஒளிபரப்பு (Cell Broadcasting System) தொழில்நுட்பத்தின் சோதனை முயற்சியாக இந்த எச்சரிக்கை அனுப்பப்பட்டது. முன்னறிவிப்பு ஏதுமின்றி ஒரே நேரத்தில் அனைத்துப் போன்களிலும் அலாரம் ஒத்திகை குரல் ஒலிக்கத் தொடங்கியதால் பொதுமக்களிடையே சலசலப்பு ஏற்பட்டது.
இயற்கைப் பேரிடர்கள் மற்றும் அவசர காலங்களில் பொதுமக்களுக்கு உடனடியாக எச்சரிக்கை தகவல்களைத் துரிதமாக வழங்கும் நாட்டின் புதிய முன்கூட்டிய அறிவிப்பு அமைப்பின் செயல்திறனைச் சோதிப்பதே இந்த நடவடிக்கையின் முக்கிய நோக்கமாகும். இந்தச் சோதனையானது எவ்வித உண்மையான ஆபத்தும் இல்லாத ஒரு வழக்கமான ஒத்திகை மட்டுமே என்றும், பொதுமக்கள் யாரும் இதனால் பீதியடையத் தேவையில்லை என்றும் அதிகாரிகள் தரப்பில் விளக்கமளிக்கப்பட்டது.
பேரிடர் காலங்களில் தகவல் தொடர்புத் தடைகளைத் தாண்டி அனைத்துக் குடிமக்களையும் ஒரே நொடியில் சென்றடையக்கூடிய இந்த நவீன தொழில்நுட்ப முறை பல்வேறு தரப்பினரிடமும் வரவேற்பைப் பெற்றுள்ளது.
இது போன்ற பாதுகாப்பு ஒத்திகைகள் எதிர்காலத்தில் நாட்டின் பிற பகுதிகளுக்கும் படிப்படியாக விரிவுபடுத்தப்பட்டுத் தொடர் சோதனைகளுக்கு உட்படுத்தப்படும் என எதிர்பார்க்கப்படுகிறது.
