ஜப்பான் விண்வெளி ஆராய்ச்சி நிறுவனமான ஜாக்ஸா (JAXA), ‘மார்ஷியன் மூன்ஸ் எக்ஸ்புளோரேஷன்’ (MMX) என்ற வரலாற்றுச் சிறப்புமிக்க திட்டத்தின் கீழ் விண்கலத்தை விண்ணில் செலுத்தத் திட்டமிட்டுள்ளது. ஜப்பானின் தனேகஷிமா விண்வெளி மையத்திலிருந்து ‘எச்3’ (H3) ராக்கெட் மூலம் இந்த விண்கலம் ஏவப்பட உள்ளது. செவ்வாய் கிரகத்தைச் சுற்றி வரும் உருளைக்கிழங்கு வடிவத்திலான ‘ஃபோபோஸ்’ (Phobos) மற்றும் ‘டீமோஸ்’ (Deimos) ஆகிய இரு நிலவுகளில், ஃபோபோஸ் நிலவில் தரையிறங்கி மண் மாதிரிகளைச் சேகரிப்பதே இந்த முக்கியத் திட்டத்தின் முதன்மை நோக்கமாகும்.
சுமார் 10 மாத பயணத்திற்குப் பிறகு செவ்வாய் கிரகத்தைச் சென்றடையும் இந்த விண்கலம், அங்கு மூன்று ஆண்டுகள் தங்கி ஆய்வுகளை மேற்கொள்ளவுள்ளது. ‘இடெஃபிக்ஸ்’ (Idefix) என்ற பிரெஞ்சு-ஜெர்மன் ரோவர் நிலவின் மேற்பரப்பில் தரையிறங்கி ஆய்வு செய்ய உள்ள நிலையில், அதன்பின் ஜப்பானிய விண்கலம் ஃபோபோஸ் நிலவிலிருந்து குறைந்தபட்சம் 10 கிராம் எடையுள்ள மண் மாதிரிகளைச் சேகரிக்கும். இந்த மாதிரிகள் அடங்கிய பாதுகாப்புப் பேழை 2031 ஆம் ஆண்டில் ஆஸ்திரேலியாவில் தரையிறக்கப்பட்டு பூமிக்குக் கொண்டுவரப்படும் எனக் விஞ்ஞானிகள் தெரிவித்துள்ளனர்.
செவ்வாயின் நிலவுகள் எவ்வாறு தோன்றின மற்றும் சூரிய குடும்பத்தின் உருவாக்கத்தின் பின்னணி குறித்துப் புரிந்துகொள்ள இந்த ஆராய்ச்சி பெரும் உதவியாக இருக்கும் என ஜாக்ஸா அமைப்பின் விஞ்ஞானிகள் நம்பிக்கை தெரிவித்துள்ளனர்.
உலகளவில் விண்வெளி துறையில் பெரும் எதிர்பார்ப்பை ஏற்படுத்தியுள்ள இந்த திட்டம் தொடர்பான அடுத்தகட்ட ஏவுதல் நடவடிக்கைகள் தீவிரமாகக் கண்காணிக்கப்பட்டு வருகின்றன.
