சென்னையில் நடைபெற்ற திமுக மகளிர் அணிப் பொதுக்கூட்டத்தில் கலந்துகொண்ட பெண் நிர்வாகி ஒருவர், தமிழக முதலமைச்சரும் தவெக தலைவருமான சி. ஜோசப் விஜய் குறித்து மேடையில் அவதூறான மற்றும் மரியாதையற்ற வார்த்தைகளைப் பயன்படுத்திப் பேசியுள்ளார். இந்த நிகழ்ச்சியில் திமுக மகளிர் அணிச் செயலாளர் கனிமொழி எம்.பி. மற்றும் சென்னை மேயர் பிரியா ஆகியோர் மேடையில் உடனிருந்த நிலையில், அந்தப் பேச்சைத் தடுத்து நிறுத்தாமல் அமைதி காத்தது தவெக தொண்டர்களிடையே கொந்தளிப்பை ஏற்படுத்தியுள்ளது. இந்த விவகாரம் தொடர்பாகத் தவெக தொழில்துறை அமைச்சர் எஸ். கீர்த்தனா உள்ளிட்ட பெண் அமைச்சர்கள் சமூக வலைதளங்கள் வாயிலாகத் தங்களது கண்டனப் பதிவுகளை வெளியிட்டுள்ளனர்.
அரசியலில் மேடை நாகரிகம் இன்றித் தரக்குறைவாகப் பேசுவது திமுகவினரின் வழக்கமான பாணி எனச் சாடியுள்ள அமைச்சர் கீர்த்தனா, மேடையில் அமர்ந்திருந்த தலைவர்கள் அதனை வேடிக்கை பார்த்தது ஜனநாயக மாண்புகளுக்கு எதிரானது என்று சுட்டிக்காட்டியுள்ளார். தேர்தலில் சந்தித்த தோல்வியின் விரக்தியால் மக்களின் பிரதிநிதியாகத் தேர்ந்தெடுக்கப்பட்ட முதலமைச்சரை இழிவாகப் பேசுவதைச் சகித்துக் கொள்ள முடியாது எனவும் அவர் குறிப்பிட்டுள்ளார். மேலும், அமைச்சர் ஜெகதீஸ்வரி மற்றும் அமைச்சர் கனிமொழி சந்தோஷ் ஆகியோரும் பொதுவெளியின் கண்ணியத்தைக் காக்க வேண்டிய தலைவர்கள் இது போன்ற அநாகரிகப் பேச்சுகளைக் கண்டிக்க வேண்டும் எனக் கேட்டுக்கொண்டுள்ளனர்.
எதிர்க்கட்சியாக உள்ள திமுகவின் இதுபோன்ற மரியாதையற்ற நடவடிக்கைகள் மக்கள் மத்தியில் அவர்களுக்குப் பின்னடைவையே ஏற்படுத்தும் எனத் தவெக தலைவர்கள் விமர்சித்துள்ளனர்.
அரசியல் மேடைகளில் பேசப்படும் எல்லை மீறிய வார்த்தைகள் மற்றும் நாகரிகமற்ற பேச்சுகள் குறித்துச் சமூக வலைதளங்களில் பலரும் தங்களது கருத்துகளைப் பதிவு செய்து வருகின்றனர்.
