அட்லாண்டிக் பெருங்கடலில் உருவான தீவிர காற்றழுத்த தாழ்வு மண்டலம் வலுப்பெற்று ‘ஆஸ்டன்’ புயலாக மாறி பிரிட்டனை நோக்கி வேகமாக நகர்ந்து வருவதாகப் பிரிட்டிஷ் வானிலை ஆய்வு மையம் (Met Office) அறிவித்துள்ளது. இதன் தாக்கத்தால் நாட்டின் பல பகுதிகளில் மணிக்கு 80 மைல் வேகம் வரை கடுமையான காற்று வீசக்கூடும் என்று கணிக்கப்பட்டுள்ளது. தொடர் மழையும் பலத்த காற்று வீசும் வாய்ப்புள்ளதால், பொதுமக்களின் பாதுகாப்பு கருதி வானிலை மையம் சார்பில் எச்சரிக்கைகள் விடுக்கப்பட்டுள்ளன.
புயல் காரணமாக ஸ்காட்லாந்து, வேல்ஸ் மற்றும் இங்கிலாந்தின் பல பகுதிகளில் கனமழை பெய்யும் என எதிர்பார்க்கப்படுவதால், மஞ்சள் மற்றும் ஆரஞ்சு நிற எச்சரிக்கைகள் பிறப்பிக்கப்பட்டுள்ளன. தாழ்வான பகுதிகளில் வெள்ளப்பெருக்கு ஏற்பட வாய்ப்புள்ளதாகவும், சாலை மற்றும் வான்வழிப் போக்குவரத்துகளில் தடைகள் ஏற்படக்கூடும் எனவும் அதிகாரிகள் எச்சரித்துள்ளனர். பொதுமக்கள் யாரும் தேவையின்றி வீட்டைவிட்டு வெளியே வர வேண்டாம் என்றும், கடற்கரையோரப் பகுதிகளுக்குச் செல்வதைத் தவிர்க்குமாறும் கேட்டுக்கொள்ளப்பட்டுள்ளனர்.
தொடர்ந்து தீவிரமடைந்து வரும் இந்த மோசமான வானிலை நிலைமையை வானிலை ஆய்வு மைய அதிகாரிகள் உன்னிப்பாகக் கண்காணித்து வருகின்றனர்.
புயலின் நகர்வுக்கு ஏற்ப பாதுகாப்பு நடவடிக்கைகளும் அவசரகால முன்னெச்சரிகைகளும் அந்தந்த உள்ளாட்சி நிர்வாகங்களால் தீவிரப்படுத்தப்பட்டு வருகின்றன.
