பிரிட்டன் தற்போது 1970-களில் நிலவிய எண்ணெய் நெருக்கடியை விட மிக மோசமான ஒரு காலக்கட்டத்தை எதிர்நோக்கி உள்ளதாக பொருளாதார வல்லுநர்கள் எச்சரித்துள்ளனர். ஈரான் மீதான அமெரிக்க-இஸ்ரேல் தாக்குதலால் ‘ஹார்முஸ் ஜலசந்தி’ முடங்கியுள்ள நிலையில், பிரிட்டனில் டீசல் மற்றும் பெட்ரோல் விலைகள் முன் எப்போதும் இல்லாத அளவுக்கு உயர்ந்துள்ளன. இதனால் வாகன ஓட்டிகள் தங்கள் வருமானத்தில் பெரும் பகுதியை எரிபொருளுக்காகவே செலவிட வேண்டிய கட்டாயத்திற்குத் தள்ளப்பட்டுள்ளனர். குறிப்பாக டீசல் விலை லிட்டருக்கு 181 பென்ஸ் (181p) என்ற உச்சத்தைத் தொட்டுள்ளது, இது கடந்த ஒரு மாதத்தில் மட்டும் 27 சதவீத உயர்வாகும்.
இந்த நெருக்கடி குறித்து நாடாளுமன்றத்தில் பேசிய பிரதமர் கீர் ஸ்டார்மர், உலகளாவிய இந்த எரிசக்தி அதிர்ச்சியை அரசாங்கம் “தனித்து நின்று” சமாளிக்க முடியாது என்று பகிரங்கமாக ஒப்புக்கொண்டுள்ளார். எரிபொருள் விலையைக் குறைக்க 5 பென்ஸ் வரிச்சலுகை (Fuel Duty Cut) மற்றும் லாப வெறி கொண்டு செயல்படும் நிறுவனங்கள் மீது நடவடிக்கை போன்ற முயற்சிகளை அரசு எடுத்தாலும், சர்வதேசச் சந்தையில் கச்சா எண்ணெய் விலை உயர்வைக் கட்டுப்படுத்துவது கடினம் என்று அவர் தெரிவித்துள்ளார். இதனால் பொதுமக்கள் தேவையற்ற பயணங்களைத் தவிர்த்து, எரிபொருளைச் சிக்கனமாகப் பயன்படுத்துமாறு அறிவுறுத்தப்பட்டுள்ளனர்.
பிரிட்டன் தனது டீசல் தேவையில் பெரும்பகுதியை இறக்குமதியையே நம்பி இருப்பதால், ஏப்ரல் நடுப்பகுதியில் சுமார் 10 சதவீத டீசல் பற்றாக்குறை ஏற்படும் என்று கணிக்கப்பட்டுள்ளது. இது நாட்டின் சரக்கு போக்குவரத்து மற்றும் விநியோகச் சங்கிலியை (Supply Chain) கடுமையாகப் பாதிக்கும் என்பதால், உணவுப் பொருட்களின் விலையும் உயரும் அபாயம் ஏற்பட்டுள்ளது. அஸ்டா (Asda) போன்ற முக்கிய பல்பொருள் அங்காடிகளில் ஏற்கனவே எரிபொருள் தேவை அதிகரித்துள்ளதாகவும், சில இடங்களில் தற்காலிகமாகப் பம்புகள் மூடப்பட்டுள்ளதாகவும் தகவல்கள் தெரிவிக்கின்றன.
இந்தச் சூழல் 1974-ம் ஆண்டில் பிரிட்டனில் நிலவிய ‘மூன்று நாள் வேலை வார’ (Three-day week) காலக்கட்டத்தை நினைவுபடுத்துவதாக பேங்க் ஆஃப் இங்கிலாந்து முன்னாள் துணை ஆளுநர் சர் ஹோவர்ட் டேவிஸ் தெரிவித்துள்ளார். ஹார்முஸ் ஜலசந்தி நீண்ட காலத்திற்கு முடக்கப்பட்டால், பிரிட்டன் மக்கள் தங்களது வாழ்க்கை முறையை முற்றிலும் மாற்றிக்கொள்ள வேண்டியிருக்கும் என்றும் அவர் எச்சரித்துள்ளார். அரசாங்கம் நிலைமையைக் கட்டுக்குள் கொண்டுவர முயற்சிப்பதாகக் கூறினாலும், சாமானிய மக்கள் தங்களின் அன்றாடச் செலவுகளைச் சமாளிக்க முடியாமல் திணறி வருவது பிரிட்டனில் பெரும் அரசியல் கொந்தளிப்பை ஏற்படுத்தியுள்ளது.
