லண்டனின் கிழக்குப்பகுதியான ஹார்ன்சர்ச் மற்றும் கிளாப்ஹாம் (Clapham) போன்ற பகுதிகளில் ஈஸ்டர் விடுமுறையை முன்னிட்டு நடைபெற்ற முட்டை வேட்டை மற்றும் சமூக ஒன்றுகூடல்கள் திடீர் வன்முறையாக மாறின. நூற்றுக்கணக்கான இளைஞர்கள் ஒன்றுகூடிய இந்த நிகழ்வுகளில், அவர்கள் திடீரென ஒருவரையொருவர் தாக்கத் தொடங்கினர். இந்த மோதலைக் கட்டுப்படுத்த வந்த காவல்துறையினர் மீதும் கற்கள் மற்றும் பொருட்களை வீசித் தாக்கியதால் அந்த இடமே போர்க்களமானது. இதனால் அமைதியான கொண்டாட்டங்கள் “கும்பல் வன்முறையாக” (Mob Mayhem) உருவெடுத்தன.
சமூக வலைதளங்களான டிக் டாக் (TikTok) மற்றும் ஸ்னாப்சாட் (Snapchat) மூலம் “லிங்க்-அப்” (Link-up) எனும் பெயரில் இந்த இளைஞர்கள் ரகசியமாக ஒன்றுகூடியது விசாரணையில் தெரியவந்துள்ளது. கிளாப்ஹாம் ஹை ஸ்ட்ரீட் பகுதியில் நூற்றுக்கணக்கான பதின்ம வயதினர் கடைகளுக்குள் புகுந்து பொருட்களைச் சேதப்படுத்தியதோடு, பட்டாசுகளை வெடிக்கச் செய்து பொதுமக்களை அச்சுறுத்தினர். இதனைத் தொடர்ந்து, நிலைமையைக் கட்டுக்குள் கொண்டு வர போலீசார் அப்பகுதியில் சிறப்பு “டிஸ்பர்சல் ஜோன்” (Dispersal Zone) எனும் தடையுத்தரவைப் பிறப்பித்தனர்.
இந்தத் திடீர் வன்முறையால் அப்பகுதியில் இருந்த கடைகள் மற்றும் வணிக நிறுவனங்கள் உடனடியாகத் தற்காலிகமாக மூடப்பட்டன. கும்பலாகச் சுற்றித்திரிந்த இளைஞர்கள் போலீசாரின் எச்சரிக்கையையும் மீறி பொதுச்சொத்துக்களைச் சேதப்படுத்தியதால், அங்கு ஆயுதமேந்திய போலீசார் குவிக்கப்பட்டனர். வன்முறையில் ஈடுபட்ட சில இளைஞர்கள் கைது செய்யப்பட்டுள்ளனர். குறிப்பாக, ஹார்ன்சர்ச் பகுதியில் தெருவில் நடந்த சண்டையின் போது பொருட்களை வீசித் தாக்கிய கும்பலை விரட்டியடிக்க போலீசார் தடியடி நடத்த வேண்டிய சூழல் ஏற்பட்டது.
ஈஸ்டர் போன்ற ஒரு புனிதமான மற்றும் குடும்பங்கள் மகிழ்ச்சியாகக் கொண்டாடும் நாளில், சமூக வலைதள வதந்திகளால் ஈர்க்கப்பட்டு இளைஞர்கள் இத்தகைய வன்முறையில் ஈடுபட்டது பிரித்தானிய மக்களிடையே பெரும் அதிருப்தியை ஏற்படுத்தியுள்ளது. பள்ளி விடுமுறை நாட்கள் என்பதால் இது போன்ற வன்முறைகள் மேலும் பரவ வாய்ப்புள்ளதாகக் கருதி, லண்டனின் முக்கிய வர்த்தக மையங்களில் போலீஸ் ரோந்து அதிகரிக்கப்பட்டுள்ளது. இந்த வன்முறைச் சம்பவங்களால் பல குடும்பங்கள் பாதியிலேயே தங்களது கொண்டாட்டங்களை முடித்துக்கொண்டு வீடு திரும்பினர்.
