பிரித்தானியப் பிரதமர் கீர் ஸ்டார்மர், இங்கிலாந்து கடல் வழியாகச் செல்லும் ரஷ்யாவின் தடை செய்யப்பட்ட எண்ணெய் டாங்கர்களை வழிமறித்துக் கைப்பற்றவும், அவற்றைத் தடுத்து நிறுத்தவும் பிரித்தானியக் கடற்படை மற்றும் சிறப்பு கமாண்டோக்களுக்கு (Royal Marines) அதிகாரம் வழங்கியுள்ளார். உக்ரைன் போருக்கான நிதியைத் திரட்ட ரஷ்யா பயன்படுத்தும் இந்த ‘நிழல் கப்பற்படை’யைச் சிதைப்பதே இதன் நோக்கம் என அவர் தெரிவித்துள்ளார். ஹெல்சின்கியில் நடைபெற்ற ஜே.இ.எஃப் (JEF) உச்சிமாநாட்டில் பேசிய ஸ்டார்மர், “புடினின் வருமான ஆதாரங்களை நாங்கள் முடக்குவோம்; இதற்காகக் கடல் எல்லையில் நேரடி நடவடிக்கைகளில் ஈடுபடவும் தயங்கமாட்டோம்” என்று அதிரடியாக அறிவித்துள்ளார்.
இந்த அறிவிப்பிற்குப் பதிலடி கொடுத்துள்ள ரஷ்ய வெளியுறவு அமைச்சகம், பிரித்தானியாவின் இந்த நடவடிக்கை சர்வதேச கடல்சார் சட்டங்களை மீறும் ஒரு “திருட்டுத்தனம்” என்று சாடியுள்ளது. “எங்கள் நாட்டு சொத்துக்களுக்கு ஏதேனும் பாதிப்பு ஏற்பட்டால், அதற்கு ‘வெடிக்கும்’ வகையிலான (Explosive retaliation) தகுந்த பதிலடி கொடுக்கப்படும்; எதையும் செய்வதற்கு முன் பிரித்தானியா சிந்தித்துச் செயல்பட வேண்டும்” என்று கிரெம்ளின் மாளிகை எச்சரித்துள்ளது. மேலும், பிரித்தானியக் கடற்படை இத்தகைய மோதலில் ஈடுபட்டால், அது இரு நாடுகளுக்கும் இடையே நேரடி இராணுவ மோதலுக்கு வழிவகுக்கும் என்றும் ரஷ்யா எச்சரித்துள்ளது.
பிரித்தானியாவின் இந்த புதிய கொள்கைப்படி, இங்கிலாந்து கடல் எல்லையான 12 கடல் மைல் தொலைவிற்குள் நுழையும் எந்தவொரு ரஷ்ய டாங்கரையும் கமாண்டோக்கள் ஏறிச் சோதனையிட முடியும். இதற்காகச் சிறப்புப் பயிற்சி பெற்ற ராயல் மரைன் வீரர்கள் தயார் நிலையில் வைக்கப்பட்டுள்ளனர். முன்னதாக, அமெரிக்கா மற்றும் பிரான்ஸ் ஆகிய நாடுகளுடன் இணைந்து ஏற்கனவே ஒரு ரஷ்ய டாங்கரை பிரித்தானியக் கடற்படை கைப்பற்றியுள்ள நிலையில், இப்போது இதனை ஒரு முறையான கொள்கையாக ஸ்டார்மர் அறிவித்துள்ளது குறிப்பிடத்தக்கது. இதனால் ஆங்கிலக் கால்வாய் (English Channel) பகுதியில் போர் மேகங்கள் சூழ்ந்துள்ளன.
சர்வதேச அளவில் இந்த விவகாரம் பெரும் பதற்றத்தை ஏற்படுத்தியுள்ளது. சீனா மற்றும் ஈரான் போன்ற நாடுகள் ரஷ்யாவிற்கு ஆதரவாகக் குரல் கொடுத்து வரும் வேளையில், நேட்டோ (NATO) நாடுகள் பிரித்தானியாவின் முடிவிற்கு ஆதரவு தெரிவித்துள்ளன. இந்த மோதல் அதிகரித்தால் உலகளாவிய எண்ணெய் விநியோகம் பாதிக்கப்படக்கூடும் என்றும், கச்சா எண்ணெய் விலை உயரும் அபாயம் இருப்பதாகவும் பொருளாதார நிபுணர்கள் எச்சரிக்கின்றனர். புடினின் நிழல் கப்பற்படையைச் சுற்றி தற்போது நடைபெற்று வரும் இந்த ‘நிழல் போர்’, விரைவில் ஒரு நேரடி கடல்சார் போராக மாறக்கூடும் என்ற அச்சம் உலக நாடுகளிடையே நிலவுகிறது.
