தமிழ்நாட்டில் உள்ள சூப்பர் மார்க்கெட் மற்றும் ஹைப்பர் மார்க்கெட் வணிக நிறுவனங்களில் வாடிக்கையாளர்கள் பொருட்களுக்குப் பணம் செலுத்தப்படுவதற்கு முன்பாகவே, உணவுப் பொட்டலங்களைப் பிரித்து உட்கொள்வது தொடர்பான வீடியோக்கள் அண்மையில் சமூக வலைதளங்களில் பரவி சர்ச்சையை ஏற்படுத்தின. குறிப்பாகச் சென்னை அண்ணா நகரில் உள்ள லுலு ஹைப்பர் மார்க்கெட்டில் சில வாடிக்கையாளர்கள் பணப்பரிவர்த்தனை முடிவதற்கு முன்பே பலகாரங்கள் மற்றும் தின்பண்டங்களைச் சாப்பிட்டுவிட்டு மீண்டும் அலமாரியிலேயே வைத்த சம்பவம் தொடர்பாகப் பரவலான விமர்சனங்கள் எழுந்தன.
இந்தச் சம்பவங்களின் தொடர்ச்சியாக, முன்னெச்சரிக்கை நடவடிக்கையாக ‘டிமார்ட்’ (DMart) சில்லறை வர்த்தகக் கடைகளிலும் வாடிக்கையாளர்களுக்கு விழிப்புணர்வு எச்சரிக்கைப் பலகைகள் வைக்கப்பட்டுள்ளன. கடைகளின் உள்ளே வைக்கப்பட்ட அந்தப் பலகைகளில், “பொருட்களை வாங்குவதற்குக் கட்டணம் செலுத்தும் முன் உணவுப் பொட்டலங்களைப் பிரித்து தயவுசெய்து சாப்பிட வேண்டாம்” எனத் தமிழில் தெளிவாகக் குறிப்பிடப்பட்டுள்ளது.
பொது இடங்களில் நுகர்வோரின் பொறுப்பற்ற இத்தகைய செயல்கள் பிற வாடிக்கையாளர்களுக்கும், வணிக வளாக நிர்வாகத்தினருக்கும் பெரும் அசௌகரியத்தை ஏற்படுத்தி வருவதாகப் பொதுமக்கள் தங்களது கருத்துக்களைப் பதிவு செய்து வருகின்றனர்.
தற்போது சென்னை உட்படப் பல்வேறு நகரங்களில் உள்ள பிற சில்லறை வணிக நிறுவனங்களும் தங்களது கடைகளில் இதேபோன்ற விழிப்புணர்வு பலகைகளையும், கண்காணிப்பு கேமரா சோதனைகளையும் தீவிரப்படுத்தத் தொடங்கியுள்ளன.
