பிரிட்டன் கடற்படையின் (Royal Navy) ‘ஹெச்.எம்.எஸ் வன்கார்ட்’ (HMS Vanguard) என்ற அணுசக்தி நீர்மூழ்கி கப்பல், கடலுக்கு அடியில் சுமார் 205 நாட்கள் நீடித்த ரோந்துப் பணியை நிறைவு செய்து ஸ்காட்லாந்தில் உள்ள ஃபாஸ்லேன் (Faslane) கடற்படை தளத்திற்குத் திரும்பியது. சுமார் 130-க்கும் மேற்பட்ட மாலுமிகளுடன் புறப்பட்ட இந்தக் கப்பல், ஆறு மாதங்களுக்கும் மேலாகப் புதுக் காற்று அல்லது சூரிய வெளிச்சத்தைக்கூடக் காணாமல் தொடர் ரோந்துப் பணியில் ஈடுபட்டுள்ளதைப் பாதுகாப்பு ஆய்வாளர்கள் உறுதிப்படுத்தியுள்ளனர். பிரிட்டன் கடற்படை வரலாற்றில் மிக நீண்ட காலம் கடலுக்கு அடியில் மேற்கொள்ளப்பட்ட தொடர் ரோந்துப் பணியாக இது பதிவாகியுள்ளது.
டிரைடென்ட் 2 (Trident 2) அணுசக்தி ஏவுகணைகளைச் சுமந்து செல்லும் திறன் கொண்ட இந்த வன்கார்ட் ரக நீர்மூழ்கி கப்பல்கள், பிரிட்டனின் முக்கிய அணுசக்தி தடுப்புப் பாதுகாப்பாகப் (Nuclear Deterrent) பணியாற்றுகின்றன. வழக்கமாக 3 மாதங்கள் மட்டுமே திட்டமிடப்படும் ரோந்துப் பணிகள், பராமரிப்புப் பணிகள் மற்றும் மாற்று நீர்மூழ்கிக் கப்பல்கள் கிடைப்பதில் ஏற்படும் தாமதம் காரணமாக 7 மாதங்கள் வரை நீட்டிக்கப்பட்டுள்ளதாகத் தெரிகிறது. நீண்ட நாட்கள் குடும்பங்களை விட்டுப் பிரிந்து, குறைந்த வசதிகளுடன் கடுமையான உளவியல் அழுத்தத்திற்கு இடையே மாலுமிகள் பணியாற்றியுள்ளனர்.
இந்த வரலாற்றுச் சிறப்புமிக்க ரோந்துப் பணியை முடித்துத் திரும்பிய மாலுமிகளைப் பிரிட்டன் பிரதமர் சேர் கீர் ஸ்டார்மர் (Keir Starmer) உட்படப் பல உயர் அதிகாரிகள் நேரில் சென்று வாழ்த்தி வரவேற்றனர். அதேவேளையில், கடற்படை வீரர்களை இவ்வளவு நீண்ட காலம் கடலுக்கு அடியில் வைத்திருப்பது அவர்களின் உடல் மற்றும் மனநலனைப் பாதிக்கும் என்றும், தளவாடப் பராமரிப்புச் சிக்கல்களை வெளிப்படுத்துகிறது என்றும் பாதுகாப்பு நிபுணர்கள் கவலை தெரிவித்துள்ளனர்.
தற்போது கரை திரும்பிய கப்பல் மற்றும் அதன் மாலுமிகளுக்குத் தேவையான ஓய்வு மற்றும் பராமரிப்புப் பணிகள் தொடங்கப்பட்டுள்ளன.
பிரிட்டன் கடற்படை தனது அணுசக்திப் பாதுகாப்புப் பணிகளைத் தொடர்ந்து தடையின்றி பராமரிக்க மாற்று ஏற்பாடுகளைச் செய்து வருகிறது.
