Posted in

தென் கொரிய வான் பாதுகாப்பு மண்டலத்தில் ரஷ்ய விமானங்கள்: போர் விமானங்களை அனுப்பிய சியோல்!

தென் கொரியாவின் வான் பாதுகாப்பு அடையாள மண்டலத்திற்குள் (KADIZ) பல ரஷ்ய ராணுவ விமானங்கள் செவ்வாய்க்கிழமை அதிகாலை முன்னறிவிப்பின்றி நுழைந்ததைத் தொடர்ந்து, தென் கொரியா தனது போர் விமானங்களை உடனடியாக அனுப்பித் தந்திரோபாய நடவடிக்கைகளை மேற்கொண்டுள்ளது. ஜப்பான் கடல் என்றும் அழைக்கப்படும் கிழக்குக் கடல் பகுதியில் இந்த ரஷ்ய விமானங்கள் நுழைந்து பின்னர் வெளியேறியதாகச் சியோலில் உள்ள கூட்டுப் படைத் தலைமையகம் (JCS) தெரிவித்துள்ளது.

வான் பாதுகாப்பு அடையாள மண்டலம் என்பது ஒரு நாட்டின் இறையாண்மைக்கு உட்பட்ட வான்வெளி அல்ல என்றாலும், பாதுகாப்பு நோக்கங்களுக்காக அந்நிய விமானங்களை அடையாளம் காண அமைக்கப்படும் ஒரு பாதுகாப்பு எல்லையாகும். பொதுவாக இந்த மண்டலத்திற்குள் நுழையும் ராணுவ விமானங்கள் சம்பந்தப்பட்ட நாட்டிற்கு முன்கூட்டியே தகவல் தெரிவிப்பது வழக்கம் எனினும், ரஷ்ய விமானங்கள் அவ்வாறு எவ்வித முன்னறிவிப்பும் இன்றி நுழைந்ததாகத் தென் கொரியாவின் யோன்ஹாப் செய்தி நிறுவனம் குறிப்பிட்டுள்ளது.

எதிர்பாராத சூழல்களை எதிர்கொள்ளும் வகையில் விமானப்படைப் போர் விமானங்களை அனுப்பித் தேவையான நடவடிக்கைகளை எடுத்ததாகத் தென் கொரியக் கூட்டுப் படைத் தலைமையகம் தனது அறிக்கையில் கூறியுள்ளது. அதே சமயம், ரஷ்ய விமானங்கள் தென் கொரியாவின் அதிகாரப்பூர்வ வான்வெளி எல்லையை மீறவில்லை என்றும் சியோல் அதிகாரிகள் உறுதிப்படுத்தியுள்ளனர்.

முன்னதாக கடந்த ஜூன் மாதமும் பத்திற்கும் மேற்பட்ட சீன மற்றும் ரஷ்ய ராணுவ விமானங்கள் தென் கொரியாவின் வான் பாதுகாப்பு மண்டலத்திற்குள் நுழைந்தபோது சியோல் போர் விமானங்களை அனுப்பியிருந்தது. தற்போதைய நிகழ்வைத் தொடர்ந்து, முன்னறிவிப்பின்றி விமானங்கள் நுழைந்ததற்குத் தூதரக வழிகள் மூலம் தென் கொரியா தனது கடும் எதிர்ப்பைப் பதிவு செய்துள்ளது.