Posted in

சென்னை-புதுச்சேரி படகு போக்குவரத்து: மத்திய அமைச்சரிடம் அமைச்சர் ஆதவ் அர்ஜுனா கோரிக்கை

தமிழ்நாடு பொதுப்பணித்துறை அமைச்சர் ஆதவ் அர்ஜுனா புதுடெல்லியில், மத்திய துறைமுகங்கள், கப்பல் போக்குவரத்து மற்றும் நீர்வழிகள் துறை அமைச்சர் சர்பானந்த சோனாவாலை நேரில் சந்தித்துப் பல்வேறு முக்கிய கோரிக்கைகளை வலியுறுத்தினார். தமிழ்நாட்டின் முக்கிய கடல்சார் கட்டமைப்பு மேம்பாட்டுத் திட்டங்களுக்கு உடனடியாக நிதியுதவி வழங்குமாறு அவர் இந்தக் சந்திப்பின் போது கேட்டுக்கொண்டார்.

இந்தச் சந்திப்பின் போது, சென்னை மெரினா, மகாபலிபுரம் மற்றும் புதுச்சேரியில் கடல் நடைபாதைகள் மற்றும் படகுத் துறைகள் அமைப்பது குறித்தும், குறிப்பாகச் சென்னை மற்றும் புதுச்சேரி இடையே பயணிகள் படகு போக்குவரத்தைத் தொடங்குவது குறித்தும் அவர் கோரிக்கை விடுத்தார். மேலும், இராமேஸ்வரம் – இலங்கை தலைமன்னார் இடையே பன்னாட்டுப் பயணிகள் படகு போக்குவரத்தைத் தொடங்குதல் மற்றும் இராமேஸ்வரம் துறைமுகத்தை மேம்படுத்துதல் போன்ற திட்டங்களுக்கும் அவர் வலியுறுத்தினார்.

இதுகுறித்து அவர் வெளியிட்டுள்ள பதிவில், கடலூர் பசுமைவள ஆழ்கடல் துறைமுக மேம்பாடு மற்றும் பக்கிங்காம் கால்வாயைப் புனரமைத்து ஆழப்படுத்துவது குறித்தும் விவாதிக்கப்பட்டதாகத் தெரிவிக்கப்பட்டுள்ளது. அதுமட்டுமின்றி, மேற்கு மற்றும் கிழக்குக் கடல் பகுதிகளை இணைக்கும் பாம்பன் கால்வாயை 10 மீட்டர் ஆழப்படுத்துவதற்கான திட்டங்களுக்கும் உடனடியாக நிதி ஒதுக்கீடு செய்ய வேண்டும் என்றும் கோரப்பட்டுள்ளது.

மத்திய அமைச்சருடனான இந்தச் சந்திப்பு தமிழ்நாட்டின் கடல்சார் போக்குவரத்து மற்றும் துறைமுக மேம்பாட்டுத் திட்டங்களை விரைவுபடுத்துவதில் முக்கியப் பங்கு வகிக்கும் என எதிர்பார்க்கப்படுகிறது. இந்தத் கோரிக்கைகள் மீதான அடுத்த கட்ட நடவடிக்கைகள் குறித்து மத்திய அமைச்சகம் விரைவில் பரிசீலிக்கும் எனத் தெரிகிறது.