தமிழகத்தில் பெண்களுக்கு வழங்கப்பட்டு வரும் மகளிர் உரிமைத்தொகைத் திட்டத்தில், இரண்டாம் கட்டமாகப் புதிதாகச் சேர்க்கப்பட்ட பல பயனாளிகளுக்குக் கடந்த மூன்று மாதங்களாக மாதம் ரூ.1,000 வழங்கப்படவில்லை எனத் தகவல்கள் வெளியாகியுள்ளன. தேர்தல் வாக்குறுதியின்படி மாதம் ரூ.2,500 எப்போது கிடைக்கும் எனப் பெண்கள் எதிர்பார்த்துக் காத்திருக்கும் நிலையில், ஏற்கனவே வழங்கப்பட்டு வந்த ரூ.1,000 தொகையும் படிப்படியாக நிறுத்தப்படுவதாகப் பிரபல நாளிதழ் ஒன்று செய்தி வெளியிட்டுள்ளது.
முன்னதாக, கடந்த 2023 செப்டம்பர் 15-ஆம் தேதி தொடங்கப்பட்ட இந்தத் திட்டத்தின் மூலம் ஆரம்பத்தில் சுமார் 1 கோடி பெண்கள் பயனடைந்த நிலையில், 2025 டிசம்பரில் கூடுதல் பயனாளிகள் சேர்க்கப்பட்டதால் அந்த எண்ணிக்கை 1.31 கோடியாக உயர்ந்தது. 2026 சட்டமன்றத் தேர்தலின்போது தாங்கள் ஆட்சிக்கு வந்தால் உரிமைத்தொகையை ரூ.2,500 ஆக உயர்த்துவதாகத் தமிழக வெற்றிக் கழகம் வாக்குறுதி அளித்திருந்த நிலையில், ஆட்சிப் பொறுப்பேற்ற பிறகு பழையபடியே மாதம் ரூ.1,000 தொடர்ந்து வழங்கப்பட்டு வந்தது.
தற்போது திட்டத்தின் பெயரை மாற்றுவது, பயனாளிகளின் தகுதிகளைச் சரிபார்ப்பது மற்றும் வங்கிக் கணக்குகளில் உள்ள ஐ.எஃப்.எஸ்.சி (IFSC) குறியீடு உள்ளிட்ட தொழில்நுட்பப் பிழைகளைச் சரிசெய்யும் பணிகள் நடைபெற்று வருவதாக அரசுத் தரப்பில் கூறப்படுகிறது. இந்தப் பணிகள் முழுமையடைந்ததும் ரூ.2,500 வழங்கப்படும் என்று அமைச்சர் ஜெகதீஸ்வரி சில நாட்களுக்கு முன்பு தெரிவித்திருந்த நிலையில், மூன்று மாதங்களாகப் பணம் வராதது பெண்கள் மத்தியில் குழப்பத்தையும் கவலையையும் ஏற்படுத்தியுள்ளது.
வங்கிக் கணக்குத் தவறுகள் அல்லது தகுதிச் சரிபார்ப்பு நடவடிக்கைகளால் குறிப்பிட்ட சிலருக்கு மட்டும் தொகை நிறுத்தி வைக்கப்பட்டுள்ளதா என்பது குறித்துத் தமிழக அரசு இதுவரை அதிகாரப்பூர்வ விளக்கம் எதையும் அளிக்கவில்லை. இடைத்தேர்தல் மற்றும் உள்ளாட்சித் தேர்தல்கள் வரவுள்ள சூழலில், யாருக்குத் தொகை நிறுத்தப்பட்டுள்ளது, மீண்டும் எப்போது வழங்கப்படும் என்பது குறித்து அரசு தெளிவுபடுத்த வேண்டும் என்பதே பயனாளிகளின் எதிர்பார்ப்பாக உள்ளது.