இந்திய கடற்படையின் பராக் ஏவுகணை பாதுகாப்பு அமைப்பை (Barak Point Defence Missile System) நவீனமயமாக்குவதற்காக, இஸ்ரேல் ஏரோஸ்பேஸ் இண்டஸ்ட்ரீஸ் (IAI) நிறுவனத்துடன் இந்திய பாதுகாப்பு அமைச்சகம் ரூ.1,976.40 கோடி (சுமார் 211.48 மில்லியன் டாலர்) மதிப்பிலான ஒப்பந்தத்தில் கையெழுத்திட்டுள்ளது. நவம்பர் 18-ஆம் தேதி புதுதில்லியில் இந்த முக்கியப் பாதுகாப்பு ஒப்பந்தம் கையெழுத்தானதாகப் பாதுகாப்பு அமைச்சகம் அதிகாரப்பூர்வமாக அறிவித்துள்ளது.
இந்த ஒப்பந்தத்தின் கீழ், போர்க்கப்பல்களில் பொருத்தப்பட்டுள்ள ஏவுகணை அமைப்புகளின் வன்பொருள் மற்றும் மென்பொருள் ஆகியவை முழுமையாக மேம்படுத்தப்பட உள்ளன. பழமையான உதிரிபாகங்களை மாற்றி நவீனத் தொழில்நுட்பங்களைப் புகுத்துவதன் மூலம், இந்தியக் கடற்படை கப்பல்களின் வான்வழிப் பாதுகாப்புத் திறன் மேலும் வலுப்பெறும் எனத் தெரிவிக்கப்பட்டுள்ளது.
கடந்த 2025-ஆம் ஆண்டு ஆகஸ்ட் மாதம் நடைபெற்ற பாதுகாப்புத் தளவாட கொள்முதல் கவுன்சில் கூட்டத்தில், கடற்படையின் பராக்-1 ஏவுகணை அமைப்புகளை மேம்படுத்துவதற்கான ஒப்புதல் அளிக்கப்பட்டிருந்தது குறிப்பிடத்தக்கது. ட்ரோன்கள், போர் விமானங்கள் மற்றும் எதிரி நாட்டு ஏவுகணைகளின் தாக்குதல்களிலிருந்து போர்க்கப்பல்களைப் பாதுகாப்பதில் இந்த அமைப்பு முக்கியப் பங்காற்றுகிறது.
இஸ்ரேல் மற்றும் இந்தியா இடையிலான நீண்டகாலப் பாதுகாப்பு ஒத்துழைப்பின் ஒரு பகுதியாக இந்த ஒப்பந்தம் மேற்கொள்ளப்பட்டுள்ளது. இந்த மேம்பாட்டுப் பணிகள் மூலம் இந்தியக் கடற்படையின் தற்காப்புத் திறன் மற்றும் செயல்பாட்டுத் தயார்நிலை அடுத்த கட்டத்திற்கு உயரும் எனப் பாதுகாப்புத் துறை வட்டாரங்கள் தெரிவித்துள்ளன.