அமெரிக்க நீதித்துறை அண்மையில் வெளியிட்டுள்ள மில்லியன் கணக்கான பக்கங்கள் கொண்ட எப்ஸ்டீன் கோப்புகளில், அவர் சட்டத்தின் பிடியில் இருந்து தப்பிக்கத் தீட்டியிருந்த “சதித் திட்டங்கள்” குறித்த திடுக்கிடும் தகவல்கள் இடம்பெற்றுள்ளன. “நான் பிடிபட்டால் என்ன செய்வது?” (What if I get caught?) என்ற தலைப்பிலான குறிப்புகளில், தனது அடையாளத்தை முற்றிலும் மாற்றிக்கொண்டு வெளிநாட்டிற்குத் தப்பிச் செல்வது குறித்த விவரங்கள் விவரிக்கப்பட்டுள்ளன. குறிப்பாக, பிளாஸ்டிக் அறுவை சிகிச்சை (Plastic Surgery) மூலம் தனது முகத் தோற்றத்தை மாற்றிக்கொண்டு, ஆள் அடையாளம் தெரியாமல் வாழ்வது குறித்து அவர் மருத்துவ நிபுணர்களுடன் ஆலோசித்ததற்கான ஆதாரங்கள் இந்த ஆவணங்களில் சிக்கியுள்ளன.
எப்ஸ்டீன் தனது ரகசியத் தீவான ‘லிட்டில் செயின்ட் ஜேம்ஸ்’ (Little St. James) பகுதியில் ஒரு சிறிய மருத்துவமனையை அமைத்திருந்தது ஏற்கனவே தெரிந்ததே. ஆனால், அங்குள்ள பல் மருத்துவ நாற்காலி (Dentist’s chair) போன்ற அமைப்புகள் வெறும் மருத்துவத்திற்காக மட்டும் பயன்படுத்தப்படவில்லை என்றும், அவசரக் காலங்களில் அறுவை சிகிச்சைகள் மூலம் தனது கைரேகைகள் மற்றும் முக அமைப்பை மாற்றிக்கொள்ள அவர் திட்டமிட்டிருந்ததாகவும் உளவுத்துறை தகவல்கள் தெரிவிக்கின்றன. இதற்காக அவர் சர்வதேச அளவில் தேடப்படும் குற்றவாளிகளுக்குத் தஞ்சம் அளிக்கும் சில ரகசிய அமைப்புகளுடன் தொடர்பில் இருந்ததும் தற்போது உறுதி செய்யப்பட்டுள்ளது.
மேலும், எப்ஸ்டீன் தனது ரகசிய ஆவணங்கள் மற்றும் ‘கிளையண்ட்’ பட்டியல்களைப் பாதுகாக்கவும், பிடிபடும் சூழல் ஏற்பட்டால் அவற்றை அழிப்பதற்கும் அதிநவீன தொழில்நுட்பங்களைப் பயன்படுத்தியுள்ளார். ஒருவேளை தான் கைது செய்யப்பட்டால், தனக்கு நெருக்கமான உலகத் தலைவர்கள் மற்றும் கோடீஸ்வரர்களை மிரட்டி (Blackmail) விடுதலையாகவும் அவர் திட்டமிட்டிருந்தார். “எனக்கு வேற வழி தெரில…” என்ற ரீதியில் அவர் எழுதியிருந்த சில குறிப்புகளில், தனது தனிப்பட்ட விமானத்தைப் பயன்படுத்தி ரேடார் கண்காணிப்பில் சிக்காத நாடுகளுக்குத் தப்பிச் செல்வதற்கான வரைபடங்களும் கண்டறியப்பட்டுள்ளன.
தற்போது அமெரிக்க நாடாளுமன்றக் குழு (House Oversight Committee) இந்த ஆவணங்களை தீவிரமாக ஆய்வு செய்து வருகிறது. 2026-ம் ஆண்டின் தொடக்கத்தில் இருந்து வெளியாகி வரும் இந்த ‘எப்ஸ்டீன் கோப்புகள்’, பல பிரபலங்களின் வாழ்க்கையில் பெரும் புயலைக் கிளப்பியுள்ளது. எப்ஸ்டீன் தப்பிக்கத் தீட்டிய இந்தச் சதித் திட்டங்களில் அவருக்கு யாரெல்லாம் உதவினார்கள் என்பது குறித்து எப்பிஐ (FBI) தனது விசாரணையைத் தீவிரப்படுத்தியுள்ளது. இந்தத் தகவல்கள் எப்ஸ்டீன் விவகாரத்தில் பல ஆண்டுகளாக நீடிக்கும் மர்மங்களுக்கு விடை காண்பதோடு, இன்னும் பல அதிர்ச்சியூட்டும் உண்மைகளை வெளிக்கொண்டு வரும் என எதிர்பார்க்கப்படுகிறது.
