கர்நாடக மாநில அரசு அலுவலகங்கள் மற்றும் பள்ளி, கல்லூரிகளுக்கான 2027-ஆம் ஆண்டின் பொது விடுமுறை நாட்கள் பட்டியலுக்கு மாநில அமைச்சரவை ஒப்புதல் அளித்துள்ள நிலையில், சனி மற்றும் ஞாயிற்றுக்கிழமைகளைத் தவிர்த்து மொத்தம் 18 பொது விடுமுறை நாட்கள் அறிவிக்கப்பட்டுள்ளன. இது தொடர்பாக எழுந்த குழப்பங்களுக்கு விளக்கமளித்துள்ள கர்நாடக பணியாளர் மற்றும் நிர்வாக சீர்திருத்தத் துறை (DPAR), சனி மற்றும் ஞாயிற்றுக்கிழமைகளில் வரும் பண்டிகைகளும் விடுமுறை நாட்களே என்பதால் பட்டியலில் அவை தனியாகக் குறிப்பிடப்படவில்லை என்று தெரிவித்துள்ளது.
அதிகாரப்பூர்வப் பட்டியலின்படி, 2027 ஜனவரி 15-ஆம் தேதி மகர சங்கராந்தி, ஜனவரி 26 குடியரசு தினம், மார்ச் 6 மகா சிவராத்திரி, மார்ச் 10 ரம்ஜான், மார்ச் 26 புனித வெள்ளி, ஏப்ரல் 7 யுகாதி, ஏப்ரல் 14 அம்பேத்கர் ஜெயந்தி, மே 1 உழைப்பாளர் தினம், மே 17 பக்ரித் மற்றும் ஜூன் 16 மொகரம் ஆகிய நாட்களுக்குப் பொது விடுமுறை அறிவிக்கப்பட்டுள்ளது. மேலும், செப்டம்பர் 4 விநாயகர் சதுர்த்தி, செப்டம்பர் 29 மகாளய அமாவாசை, அக்டோபர் 2 காந்தி ஜெயந்தி, அக்டோபர் 15 வால்மீகி ஜெயந்தி, அக்டோபர் 28 நரக சதுர்தசி, அக்டோபர் 30 தீபாவளி, நவம்பர் 1 கன்னட ராஜ்யோத்சவா மற்றும் நவம்பர் 16 கனகதாசர் ஜெயந்தி ஆகிய நாட்களும் இந்தப் பட்டியலில் இடம்பெற்றுள்ளன.
அதேநேரம், ஏப்ரல் 18 மகாவீர் ஜெயந்தி, மே 9 பசவேஸ்வரர் ஜெயந்தி, ஆகஸ்ட் 15 சுதந்திர தினம் மற்றும் மிலாடி நபி, அக்டோபர் 10 விஜயதசமி ஆகியவை ஞாயிற்றுக்கிழமைகளிலும், அக்டோபர் 9 மகாநவமி (ஆயுத பூஜை) இரண்டாவது சனிக்கிழமையிலும், டிசம்பர் 25 கிறிஸ்துமஸ் நான்காவது சனிக்கிழமையிலும் வருவதால் அவை தனியாகப் பட்டியலிடப்படவில்லை என்று விளக்கமளிக்கப்பட்டுள்ளது. இவை தவிர, குடகு (Kodagu) மாவட்டத்தின் பாரம்பரிய மற்றும் கலாச்சார விழாக்களுக்கு முக்கியத்துவம் அளிக்கும் வகையில், செப்டம்பர் 3 கைல் முஹூர்த்தா, அக்டோபர் 18 துலா சங்கரமணா மற்றும் டிசம்பர் 13 ஹுத்ரி பண்டிகை ஆகிய 3 நாட்களுக்குக் குடகு மாவட்டத்திற்கு மட்டும் உள்ளூர் பொது விடுமுறை அறிவிக்கப்பட்டுள்ளது.
இவற்றுடன், அரசு ஊழியர்கள் தங்கள் விருப்பத்திற்கேற்பப் பயன்படுத்திக்கொள்ளும் வகையில் 19 வரையறுக்கப்பட்ட விடுமுறை (Restricted Holidays) நாட்களுக்கும் கர்நாடக அமைச்சரவை ஒப்புதல் அளித்துள்ளது. இரண்டாவது மற்றும் நான்காவது சனிக்கிழமைகள் மற்றும் ஞாயிற்றுக்கிழமைகளுடன் சேர்த்து, 2027-ஆம் ஆண்டில் மொத்த பொது விடுமுறை நாட்கள் வழக்கமான நடைமுறைப்படியே அமல்படுத்தப்படும் எனத் தெரிவிக்கப்பட்டுள்ளது.