செயற்கை நுண்ணறிவு (AI) தொழில்நுட்பத்தைப் பயன்படுத்தி, பெண்களின் புகைப்படங்களிலிருந்து ஆடைகளை அகற்றி அவர்களை நிர்வாணமாகக் காட்டும் ‘நியூடிஃபை’ செயலிகள் ஆப்பிள் ஆப் ஸ்டோர் மற்றும் கூகுள் பிளே ஸ்டோரில் தடையின்றி இயங்கி வருகின்றன. ‘டெக் டிரான்ஸ்பரன்சி புராஜெக்ட்’ (TTP) நடத்திய ஆய்வில், இந்த வகை செயலிகள் இதுவரை சுமார் 48 கோடிக்கும் அதிகமான முறை பதிவிறக்கம் செய்யப்பட்டுள்ளதும், 122 மில்லியன் டாலர் (சுமார் ₹1,000 கோடி) வருமானத்தை ஈட்டியுள்ளதும் தெரியவந்துள்ளது. இந்த வருவாயில் 30 சதவீதம் வரை கமிஷனாகப் பெறுவதன் மூலம் ஆப்பிள் மற்றும் கூகுள் நிறுவனங்கள் இந்த ஆபாசத் தொழில்நுட்பத்திலிருந்து நேரடியாக லாபம் அடைவதாகக் குற்றம் சாட்டப்பட்டுள்ளது.
இந்த விவகாரம் குறித்து எக்ஸ் (X) தளத்தின் உரிமையாளர் எலான் மஸ்க் தனது பாணியில் ஒரு கேள்வியை எழுப்பியுள்ளார். ஏற்கனவே எக்ஸ் தளத்தின் ‘க்ரோக்’ (Grok) ஏஐ கருவி மூலம் இத்தகைய படங்கள் உருவாக்கப்படுவதாகக் கூறி ஆப்பிள் மற்றும் கூகுள் நிறுவனங்கள் மஸ்க்கிற்கு அழுத்தம் கொடுத்து வந்தன. இந்தச் சூழலில், “எக்ஸ் தளத்தை விமர்சிக்கும் இந்த நிறுவனங்கள், தங்களது சொந்த ஸ்டோர்களில் இத்தகைய செயலிகள் மூலம் பல மில்லியன் டாலர்களைச் சம்பாதிப்பது ஏன்? இது இரட்டை வேடம் இல்லையா?” என்ற தொனியில் மஸ்க் கேள்வி எழுப்பியுள்ளார். மஸ்க்கின் இந்தக் கேள்வி சிலிக்கான் வேலி நிறுவனங்களிடையே பெரும் விவாதத்தை உண்டாக்கியுள்ளது.
இந்த ஆய்வு அறிக்கையின்படி, சுமார் 100-க்கும் மேற்பட்ட இத்தகைய செயலிகள் இரண்டு ஸ்டோர்களிலும் கண்டறியப்பட்டுள்ளன. இதில் அதிர்ச்சியூட்டும் விஷயம் என்னவென்றால், 31 நியூடிஃபை செயலிகள் குழந்தைகளுக்கு ஏற்றவை (Suitable for minors) என்ற தரவரிசையில் உள்ளன. பள்ளிக் குழந்தைகள் மற்றும் ஆசிரியர்களின் புகைப்படங்களைச் சிதைக்க இத்தகைய செயலிகள் பயன்படுத்தப்படுவதாகப் புகார்கள் எழுந்துள்ளன. ஆப்பிள் மற்றும் கூகுள் நிறுவனங்கள் இத்தகைய உள்ளடக்கங்களைத் தடை செய்துள்ளதாகக் கூறினாலும், ‘ஆட்டோகம்ப்ளீட்’ மற்றும் விளம்பரங்கள் மூலம் பயனர்களை இத்தகைய செயலிகளை நோக்கித் தள்ளுவதாக ஆய்வில் கண்டறியப்பட்டுள்ளது.
இந்த விவகாரம் தொடர்பாக ஆப்பிள் மற்றும் கூகுள் நிறுவனங்களுக்கு அமெரிக்க செனட் உறுப்பினர் ஜான் ஓசாஃப் (Jon Ossoff) கடும் கண்டனம் தெரிவித்துக் கடிதம் எழுதியுள்ளார். “அப்பாவி பெண்களின் கண்ணியத்தைச் சிதைக்கும் இந்தச் செயலிகள் மூலம் லாபம் ஈட்டுவது சட்டவிரோதமானது” என்று அவர் குறிப்பிட்டுள்ளார். புகார்களைத் தொடர்ந்து சில செயலிகளை இரண்டு நிறுவனங்களும் நீக்கியுள்ள போதிலும், புதிய பெயர்களில் இத்தகைய செயலிகள் மீண்டும் மீண்டும் ஸ்டோர்களில் நுழைவது பெரும் சவாலாக உள்ளது. 2026-ஆம் ஆண்டில் செயற்கை நுண்ணறிவுத் தொழில்நுட்பத்தின் இருண்ட பக்கமாக இந்த விவகாரம் பார்க்கப்படுகிறது.
