திரையுலகில் இருந்து அரசியலுக்கு அதிரடியாகக் கால் பதித்துள்ள நடிகர் விஜய்யின் ‘தமிழக வெற்றிக் கழகம்’ (தவெக) கட்சி, தற்போது சின்னத்திரை நட்சத்திரங்களின் சங்கமமாக மாறி வருகிறது. ஏற்கனவே பல முன்னணி நடிகர், நடிகைகள் விஜய்க்குத் தங்கள் ஆதரவைத் தெரிவித்து வரும் நிலையில், தற்போது சின்னத்திரையின் பிரபல முகங்கள் அதிகாரப்பூர்வமாகத் தங்களை அக்கட்சியில் இணைத்துக் கொண்டுள்ளனர். குறிப்பாக, ‘பாண்டியன் ஸ்டோர்ஸ்’ புகழ் சாந்தினி பிரகாஷ் ஏற்கனவே கட்சியில் இணைந்த நிலையில், தற்போது மேலும் சில முக்கியப் பிரபலங்கள் இந்தப் பட்டியலில் இணைந்துள்ளனர்.
பிக் பாஸ் நிகழ்ச்சியின் மூலம் மக்கள் மத்தியில் நீங்கா இடம் பிடித்த சீரியல் நடிகர் தினேஷ் கோபால்சாமி தற்போது தவெகவில் இணைந்துள்ளார். இது குறித்து அவர் நெகிழ்ச்சியுடன் கூறுகையில், விஜய் அரசியலில் சந்திக்கும் தடைகளைத் தாண்டி மக்களிடம் அவர் காட்டும் தன்னம்பிக்கை தன்னைப் பெரிதும் கவர்ந்ததாகவும், அவரது புதிய அரசியல் பயணத்தில் ஒரு அடையாளமாக இருக்க விரும்புவதாகவும் தெரிவித்துள்ளார். ரச்சிதாவின் முன்னாள் கணவரான தினேஷின் இந்த அரசியல் வரவு சின்னத்திரை வட்டாரத்தில் பெரும் பேசுபொருளாகியுள்ளது.
இதேபோல், பிக் பாஸ் மற்றும் ‘சின்ன மருமகள்’ சீரியல் மூலம் பிரபலமான தாமரைச் செல்வியும் தற்போது விஜய் கட்சிக்கு ஆதரவாகக் களம் இறங்கியுள்ளார். தான் நடித்து வந்த சீரியலில் இருந்து விலகிய தாமரை, தற்போது தவெக கட்சிக்கு ஆதரவாகத் தீவிரப் பிரச்சாரத்தில் ஈடுபட்டு வரும் புகைப்படங்கள் இணையத்தில் வைரலாகி வருகின்றன. சின்னத்திரை நட்சத்திரங்கள் இப்படித் தொடர்ந்து விஜய்யின் பக்கம் அணிவகுப்பது, வரும் தேர்தல்களில் தவெக கட்சிக்கு ஒரு மிகப்பெரிய பலமாக அமையும் என எதிர்பார்க்கப்படுகிறது.
