ரகசியமாக அதிரடி காட்டிய சவுதி அரேபியா; ஈரான் எல்லைக்குள் புகுந்து வான்வழித் தாக்குதல் – முதல்முறையாக நேரடியாக மோதிய இரு வல்லரசு நாடுகள் ?

சவுதி அரேபியாவின் வான்படை கடந்த மார்ச் மாத இறுதியில் ஈரான் நாட்டின் எல்லைக்குள் புகுந்து பல ரகசியத் தாக்குதல்களை நடத்தியுள்ளதாக ராய்ட்டர்ஸ் (Reuters) செய்தி நிறுவனம் செய்தி வெளியிட்டுள்ளது. சவுதி மண்ணில் ஈரான் ஆதரவு குழுக்கள் நடத்திய ஏவுகணை மற்றும் ட்ரோன் தாக்குதல்களுக்குப் பதிலடி கொடுக்கும் வகையில் இந்த ‘நேருக்கு நேர்’ (Tit-for-tat) தாக்குதல் நடத்தப்பட்டுள்ளது. சவுதி அரேபியா இதுவரை தனது பாதுகாப்புக்காகப் பிற நாடுகளையே நம்பியிருந்த நிலையில், முதல்முறையாக ஈரான் மண்ணில் நேரடியாக ராணுவ நடவடிக்கையை மேற்கொண்டிருப்பது குறிப்பிடத்தக்க மாற்றமாகக் கருதப்படுகிறது.

இந்தத் தாக்குதல் குறித்து சவுதி அரேபியா அதிகாரப்பூர்வமாகத் தகவல்களை வெளியிடவில்லை என்றாலும், “தற்காப்புக்காக ராணுவ நடவடிக்கை எடுக்க எங்களுக்கு முழு உரிமை உள்ளது” என்று அந்நாட்டின் வெளியுறவுத் துறை அமைச்சகம் ஏற்கனவே எச்சரித்திருந்தது. சவுதி மற்றும் ஐக்கிய அரபு அமீரகம் (UAE) ஆகிய நாடுகள் இணைந்து ஈரானின் ராணுவ நிலைகளைக் குறிவைத்துத் தாக்கியுள்ளதாக உளவுத் தகவல்கள் தெரிவிக்கின்றன. ஈரானின் ஆதிக்கத்தைக் கட்டுப்படுத்தவும், தங்கள் நாட்டின் மீதான தொடர் தாக்குதல்களை நிறுத்தவும் சவுதி இந்த அதிரடி முடிவை எடுத்துள்ளது.

இருப்பினும், இந்தத் தாக்குதலுக்குப் பிறகு சவுதி மற்றும் ஈரான் இடையே ரகசியத் தூதரகப் பேச்சுவார்த்தைகள் தீவிரமடைந்துள்ளன. ஒரு பெரிய பிராந்தியப் போரைத் தவிர்ப்பதற்காக, இரு நாடுகளும் ஒரு ‘மறைமுக உடன்பாட்டிற்கு’ (Informal understanding) வந்துள்ளதாகக் கூறப்படுகிறது. இதன் விளைவாகவே, ஏப்ரல் மாதத் தொடக்கத்தில் சவுதி அரேபியா மீது நடத்தப்படும் ட்ரோன் தாக்குதல்களின் எண்ணிக்கை 105-லிருந்து 25-ஆகக் குறைந்துள்ளது. “மோதல் அதிகரிப்பதைத் தடுத்து அமைதியை நிலைநாட்டவே நாங்கள் விரும்புகிறோம்” என்று சவுதி தரப்பில் விளக்கம் அளிக்கப்பட்டுள்ளது.

மறுபுறம், ஈரானும் இந்தத் தாக்குதல் குறித்துப் பெரிய அளவில் எதிர்வினையாற்றாமல் அமைதி காப்பது ஆச்சரியத்தை ஏற்படுத்தியுள்ளது. அமெரிக்கா மற்றும் இஸ்ரேலுடனான போரில் ஏற்கனவே ஈரான் சிக்கியுள்ள நிலையில், சவுதியுடன் மற்றொரு நேரடிப் போரைத் தொடங்க அது விரும்பவில்லை என்று தெரிகிறது. பாகிஸ்தான் போன்ற நாடுகள் இந்த இரு நாடுகளுக்கும் இடையே சமரச முயற்சியில் ஈடுபட்டு வரும் சூழலில், சவுதியின் இந்த ரகசியத் தாக்குதல் செய்தி, அரபு நாடுகளின் புதிய ராணுவ பலத்தைப் பறைசாற்றுவதாக அமைந்துள்ளது.