தமிழக சட்டமன்றத் தேர்தலில் அமோக வெற்றி பெற்று, தமிழக வெற்றிக் கழகத்தின் (தவெக) தலைவர் சி. ஜோசப் விஜய் முதலமைச்சராகப் பொறுப்பேற்றுள்ள நிலையில், தேர்தல் வாக்குறுதிகளை நிறைவேற்றுவதில் புதிய அரசு தீவிரம் காட்டி வருகிறது. தவெக தனது தேர்தல் அறிக்கையில் “மகளிருக்கு மாதம் ரூ.2,500 உரிமைத்தொகை வழங்கப்படும்” என்று அறிவித்திருந்த சூழலில், தற்போது சமூக வலைத்தளங்களில் ஜூன் மாதம் முதல் பெண்களுக்கு ரூ.3,000 தவெக அரசால் வழங்கப்படவுள்ளதாக ஒரு புதிய தகவல் தீயாகப் பரவி பெரும் பரபரப்பை ஏற்படுத்தியுள்ளது.
திமுக ஆட்சிக் காலத்தில் வழங்கப்பட்டு வந்த ரூ.1,000 மகளிர் உரிமைத் தொகையை உயர்த்தி வழங்க முதல்வர் விஜய் ஏற்கனவே திட்டமிட்டுள்ளார். எனினும், முந்தைய ஆட்சியில் தகுதியற்ற பலருக்கு இந்தத் தொகை சென்றடைந்துள்ளதாகவும், குறிப்பாக வடமாநிலத்தவர் வரை முறைகேடாகப் பணம் பெற்றுள்ளனர் என்றும் புதிய நிதி அமைச்சர் மேரி வில்சன் அண்மையில் குற்றம் சாட்டியிருந்தார். இதனால், இத்திட்டத்தை முழுமையாக மறுசீரமைப்பு (Restructure) செய்யவும், தகுதியான உண்மையான பயனாளிகளைத் தேர்வு செய்யவும் தவெக அரசுக்குக் கூடுதல் கால அவகாசம் தேவைப்படுகிறது.
சமூக வலைத்தளங்களில் ஜூன் மாதம் ரூ.3,000 ‘ஜாக்பாட்’ தொகையாகக் குடும்பத் தலைவிகளின் கணக்கில் வரவு வைக்கப்படும் எனப் பரவும் தகவல்கள் முற்றிலும் வதந்தியே என்று தலைமைச் செயலக வட்டாரங்கள் தெளிவுபடுத்தியுள்ளன. மாநிலத்தின் நிதி நிலைமை மோசமாக இருப்பதாலும், கடன் சுமை ரூ.10 லட்சம் கோடியைத் தாண்டியுள்ளதாலும், முதலில் நிதி நிலை குறித்த ‘வெள்ளை அறிக்கை’ வெளியிடப்படவுள்ளது. அதன் பின்னரே, தகுதியான பயனாளிகள் பட்டியலிடப்பட்டு தவெக வாக்குறுதி அளித்தபடி ரூ.2,500 உரிமைத்தொகை உயர்வு முறைப்படி அமலுக்கு வரும் எனத் தெரிகிறது.
தேர்தல் களத்தில் மக்கள் அளித்த பேராதரவிற்குப் பிரதிபலனாக, பெண்களுக்கான இந்த மாபெரும் நிதி உதவித் திட்டம் எவ்வித முறைகேடுகளும் இன்றி, முழுமையாக ஏழை எளியப் பெண்களைச் சென்றடைவதை முதலமைச்சர் விஜய் நேரடியாகக் கண்காணித்து வருகிறார். எனவே, பயனாளிகள் கணக்கெடுப்பு மற்றும் தகுதி வரம்புகளை முறைப்படுத்தும் அரசுப் பணிகள் முழுமையாக நிறைவடைந்த பின்னரே, மகளிர் உரிமைத்தொகை உயர்வு குறித்த அதிகாரப்பூர்வமான அரசாணையைத் தவெக அரசு வெளியிடும் என்று சமூக நலத்துறை அதிகாரிகள் தெரிவித்துள்ளனர்.
