மைக்ரோசாப்ட் (Microsoft) நிறுவனத்தின் நிறுவனரும், உலகின் முன்னணி கோடீஸ்வரர்களில் ஒருவருமான பில் கேட்ஸ் (Bill Gates) மற்றும் அவரது முன்னாள் மனைவி மெலிண்டா பிரெஞ்ச் கேட்ஸ் ஆகியோரின் விவாகரத்து விவகாரம் குறித்து புதிய அதிர்ச்சித் தகவல்கள் வெளியாகியுள்ளன. அமெரிக்க நீதித்துறை (DOJ) வெளியிட்டுள்ள ரகசிய ஆவணங்கள் மற்றும் கோப்புகளின் அடிப்படையில், பில் கேட்ஸ் தனது 27 ஆண்டுகால திருமண வாழ்க்கையின் போது 20-க்கும் மேற்பட்ட பெண்களுடன் கள்ளத்தொடர்பில் (Extramarital Affairs) ஈடுபட்டதாக விவாகரத்து ஆவணங்களில் குற்றம் சாட்டப்பட்டுள்ளது உலகளவில் பெரும் பரபரப்பை ஏற்படுத்தியுள்ளது.
பாலியல் குற்றவாளியான மறைந்த தொழிலதிபர் ஜெஃப்ரி எப்ஸ்டீன் (Jeffrey Epstein) தொடர்பான வழக்கு ஆவணங்கள் அண்மையில் அமெரிக்காவில் பொதுவெளியில் கசிந்தன. இதில் பில் கேட்ஸுக்கும், எப்ஸ்டீனுக்கும் இடையே இருந்த நெருங்கிய தொடர்புகள் மற்றும் மின்னஞ்சல் (Emails) உரையாடல்கள் அம்பலமாகின. இந்த விவகாரங்கள் குறித்து மைக்ரோசாப்ட் அமைப்பின் உள்விவரங்களை அறிந்த முக்கிய நபர்கள் வழங்கிய தகவல்களின் படி, மெலிண்டா தொடர்ந்த விவாகரத்து விசாரணையின் போது பில் கேட்ஸின் அடுக்கடுக்கான கள்ளத்தொடர்புகள் மற்றும் அவரது தனிப்பட்ட நடத்தைகள் ஆதாரங்களுடன் சமர்ப்பிக்கப்பட்டதாகத் தெரியவந்துள்ளது.
குறிப்பாக, பில் கேட்ஸ் ரஷ்யாவைச் சேர்ந்த இரு இளம்பெண்களுடன் ரகசியத் தொடர்பில் இருந்ததை அண்மையில் தனது அறக்கட்டளை ஊழியர்களுடனான கூட்டத்தில் அவரே ஒப்புக்கொண்டதாகக் கூறப்படுகிறது. மைக்ரோசாப்ட் மற்றும் அவரது அணுசக்தி நிறுவனமான டெர்ராபவர் (TerraPower) ஆகியவற்றில் பணியாற்றிய பெண் ஊழியர்களுடனும் பில் கேட்ஸ் எல்லை மீறி நடந்து கொண்டதாகப் புகார்கள் எழுந்துள்ளன. பில் கேட்ஸின் இந்தத் தொடர்ச்சியான துரோகங்களும், ஆபத்தான எப்ஸ்டீன் உடனான நட்பும்தான் மெலிண்டா கேட்ஸ் கடந்த 2021ஆம் ஆண்டு விவாகரத்து பெற்றுப் பிரிவதற்கு முதன்மைக் காரணம் என்பது இந்த புதிய கோப்புகள் மூலம் தெளிவாகியுள்ளது.
ஒரு காலத்தில் உலகளாவிய தொண்டு பணிகளுக்காக நற்பெயரைப் பெற்றிருந்த பில் கேட்ஸின் பிம்பம், இந்த 20-க்கும் மேற்பட்ட கள்ளத்தொடர்பு புகார்களால் தற்போது முற்றிலும் சிதைந்துள்ளதாக சர்வதேச ஊடகங்கள் விமர்சித்துள்ளன. இந்த ஊழல் குற்றச்சாட்டுகளின் எதிரொலியால், இந்தியாவின் சர்வதேச செயற்கை நுண்ணறிவு (AI) மாநாடு மற்றும் வாரன் பபெட்டின் பெர்க்ஷயர் ஹாத்வே கூட்டங்களில் இருந்து பில் கேட்ஸ் புறக்கணிக்கப்பட்டுள்ளார். மேலும், ஜூன் 10ஆம் தேதி அமெரிக்க நாடாளுமன்ற விசாரணைக் குழுவின் (Congressional Hearing) முன்பாக பில் கேட்ஸ் ஆஜராகி விளக்கம் அளிக்க உள்ளதால், இந்த விவகாரம் சர்வதேச அளவில் பெரும் விவாதப் புயலைக் கிளப்பியுள்ளது.
