மத்திய கிழக்கில் மீண்டும் போர் மூளும் அபாயம் ஏற்பட்டுள்ள நிலையில், இஸ்ரேல் மீதான ராணுவத் தாக்குதல்களைத் தற்காலிகமாக நிறுத்துவதாக ஈரான் அதிரடியாக அறிவித்துள்ளது. அமெரிக்க அதிபர் டொனால்ட் டிரம்ப் விடுத்த அவசர அமைதி அழைப்பைத் தொடர்ந்து இந்த முடிவு எடுக்கப்பட்டுள்ளது. இரு நாடுகளும் உடனடியாகத் துப்பாக்கிச் சூடு மற்றும் ஏவுகணைத் தாக்குதல்களை நிறுத்த வேண்டும் என்றும், இருதரப்பும் உடனடி போர்நிறுத்தத்தை விரும்புவதாகவும் டிரம்ப் தனது சமூக ஊடகப் பக்கத்தில் வலியுறுத்தியதை அடுத்து இந்த முன்னேற்றம் ஏற்பட்டுள்ளது.
முன்னதாக, லெபனான் தலைநகர் பெய்ரூட்டில் இஸ்ரேல் நடத்திய வான்வழித் தாக்குதலுக்குப் பதிலடியாக, இஸ்ரேல் மீது ஈரான் மற்றும் ஏமனின் ஹூதி கிளர்ச்சியாளர்கள் சரமாரியாக ஏவுகணைகளை வீசித் தாக்கினர். இதற்குப் போட்டியாக இஸ்ரேலும் ஈரானின் டெஹ்ரான், தப்ரீஸ், இஸ்ஃபஹான் மற்றும் ஒரு முக்கிய பெட்ரோகெமிக்கல் தொழிற்சாலை ஆகியவற்றின் மீது குண்டுகளை வீசியது. கடந்த ஏப்ரல் 8-ஆம் தேதி அமெரிக்கா மற்றும் ஈரான் இடையே எட்டப்பட்ட தற்காலிக போர்நிறுத்த ஒப்பந்தத்திற்குப் பிறகு, இரு நாடுகளும் நேரடியாக மோதிக்கொண்ட மிக மோசமான ராணுவ நடவடிக்கை இதுவாகும்.
ஈரானின் கூட்டு ராணுவத் தலைமையகம் வெளியிட்டுள்ள அறிக்கையில், இஸ்ரேலின் அத்துமீறல்களுக்குத் தகுந்த “வலிமிகுந்த பதில்” வழங்கப்பட்டு விட்டதால், தற்போது தாக்குதல்கள் நிறுத்தப்படுவதாகக் கூறப்பட்டுள்ளது. எனினும், லெபனான் அல்லது ஈரான் எல்லைக்குள் இஸ்ரேல் மீண்டும் தனது தாக்குதலைத் தொடர்ந்தால், இதைவிடப் பல மடங்கு கொடூரமான மற்றும் அழிவுகரமான எதிர்விளைவுகளைச் சந்திக்க நேரிடும் என்றும் ஈரான் ராணுவம் எச்சரித்துள்ளது. ஈரானின் இந்த அறிவிப்பைத் தொடர்ந்து ஈராக் தனது வான்வெளியை மீண்டும் திறந்துள்ளது.
மறுபுறம், அதிபர் டிரம்பின் வேண்டுகோளை ஏற்று இஸ்ரேலும் ஈரான் மீதான வான்வழித் தாக்குதல்களை நிறுத்த ஒப்புக்கொண்டுள்ளதாக அந்நாட்டு ஊடகங்கள் தெரிவிக்கின்றன. அமெரிக்கா முன்னெடுத்து வரும் இறுதி அமைதிப் பேச்சுவார்த்தைக்கான முயற்சிகள் இறுதிக்கட்டத்தை எட்டியுள்ளதாகவும், விரைவில் நல்ல முடிவு எட்டப்படும் என்றும் டிரம்ப் நம்பிக்கை தெரிவித்துள்ளார். இந்த திடீர் போர்நிறுத்த அறிவிப்பால் உலக சந்தையில் கச்சா எண்ணெய் விலை வீழ்ச்சியடைந்ததுடன், உலகப் பங்குச்சந்தைகளும் சரிவில் இருந்து மீளத் தொடங்கியுள்ளன.
