அண்ணல் அம்பேத்கர் அயலக உயர்கல்வி உதவித்தொகைத் திட்டத்தின் கீழ் வெளிநாடுகளில் படிக்கும் பட்டியல் மற்றும் பழங்குடியின மாணவர்களுக்கு நிதி விடுவிப்பதில் தாமதம் ஏற்படுவதாக எழுந்த புகார்களுக்குத் தமிழக அரசு விளக்கம் அளித்துள்ளது. மாணவர்களுக்கான கல்வி உதவித்தொகை விடுவிப்பில் எவ்வித தாமதமும் இல்லை என ஆதிதிராவிடர் மற்றும் பழங்குடியினர் நலத்துறை அதிகாரப்பூர்வமாகத் தெரிவித்துள்ளது.
தகவல் அறியும் உரிமைச் சட்டத்தின் (RTI) கீழ் பெறப்பட்ட தரவுகளின்படி, 2026-27 கல்வியாண்டில் தேர்வு செய்யப்பட்ட 365 மாணவர்களில் வெளிநாட்டுப் பல்கலைக்கழகங்களில் சேர்ந்த 164 பேரில், 65 மாணவர்களுக்கு மட்டுமே ரூ.19.53 கோடி நிதி விடுவிக்கப்பட்டுள்ளதாகத் தகவல்கள் வெளியாகின. இதனால் இங்கிலாந்து, ஆஸ்திரேலியா உள்ளிட்ட நாடுகளில் படிக்கும் மாணவர்கள் கல்விக் கட்டணம் மற்றும் அன்றாடச் செலவுகளைச் சமாளிக்க முடியாமல் சிரமப்படுவதாகப் புகார்கள் எழுந்தன.
இந்த விவகாரம் குறித்து திமுக தலைவர் மு.க. ஸ்டாலின் மற்றும் சட்டசபை எதிர்க்கட்சித் தலைவர் உதயநிதி ஸ்டாலின் ஆகியோர் முதலமைச்சர் விஜய் தலைமையிலான தமிழக அரசைக் கடுமையாக விமர்சித்துள்ளனர். மாணவர்களின் உயர்கல்வி பாதிக்கப்படாமல் இருக்க நிலுவையில் உள்ள கல்வி உதவித்தொகையை அரசு உடனடியாக விடுவிக்க வேண்டும் என அவர்கள் வலியுறுத்தியுள்ளனர்.
இதற்குப் பதிலளித்துள்ள தமிழக அரசு, நடப்பு கல்வியாண்டில் இதுவரை 84 மாணவர்களுக்கு ரூ.30.24 கோடி உதவித்தொகை விடுவிக்கப்பட்டுள்ளதாகவும், மீதமுள்ளவர்களின் விண்ணப்பங்கள் சரிபார்க்கப்பட்டு வருவதாகவும் விளக்கமளித்துள்ளது. மேலும், மாணவர்களின் ஆரம்பக்கட்ட செலவுகளுக்காக தாட்கோ (TAHDCO) மூலம் 116 மாணவர்களுக்கு ரூ.9.50 கோடி சிறப்புக் கல்விக் கடன் வழங்கப்பட்டுள்ளதாகவும், 25 மாணவர்கள் இன்னும் இணையதளத்தில் விண்ணப்பிக்கவில்லை என்றும் அரசுத் தரப்பில் தெரிவிக்கப்பட்டுள்ளது.
