உலகம் முழுவதும் மைக்ரோசாப்ட் (Microsoft) நிறுவனத்தின் கிளவுட் சேவைகளில் ஏற்பட்ட திடீர் தொழில்நுட்பக் கோளாறு காரணமாக, மைக்ரோசாப்ட் 365, அவுட்லுக் (Outlook) மற்றும் டீம்ஸ் (Teams) ஆகிய சேவைகள் முடங்கியுள்ளன. நவம்பர் 12-ஆம் தேதி பிற்பகல் முதல் தொடங்கிய இந்தச் சிக்கலால், உலகளவில் உள்ள லட்சக்கணக்கான பயனர்கள் மற்றும் அரசு அலுவலகங்களின் பணிகள் பாதிக்கப்பட்டுள்ளன.
சர்வர்களில் பாதுகாப்பான இணைப்பை உருவாக்கும் செயல்முறையில் ஏற்பட்ட அதிகப்படியான அழுத்தமே (overwhelmed) இந்தச் சேவை முடக்கத்திற்குக் காரணம் என மைக்ரோசாப்ட் நிறுவனம் கண்டறிந்துள்ளது. இந்தத் தொழில்நுட்பக் கோளாறால் அவுட்லுக் மின்னஞ்சல் சேவை, மைக்ரோசாப்ட் டீம்ஸ், ஒன்டிரைவ் (OneDrive) மற்றும் கோபைலட் (Copilot) செயற்கை நுண்ணறிவுச் சேவைகளைப் பயன்படுத்துவதில் பயனர்களுக்குத் தடை ஏற்பட்டுள்ளது. டவுன்டிடெக்டர் (Downdetector) இணையதளத்தில் மட்டும் அவுட்லுக் சேவை முடக்கம் தொடர்பாகச் சுமார் 1,30,000-க்கும் மேற்பட்ட புகார்கள் பதிவாகியுள்ளன.
இந்தச் சேவை முடக்கம் காரணமாக ஆஸ்திரேலியாவின் கூட்டாட்சி காவல்துறை, பாதுகாப்பு அமைப்புகள் மற்றும் பல்கலைக்கழகங்களின் நிர்வாகப் பணிகள் பாதிக்கப்பட்டுள்ளதாகத் தகவல்கள் வெளியாகியுள்ளன. மேலும், மைக்ரோசாப்ட் கட்டமைப்புடன் இணைக்கப்பட்டுள்ள ஓபன்ஏஐ (OpenAI) மற்றும் ஆந்த்ரோபிக் (Anthropic) ஆகிய நிறுவனங்களின் சேவைகளிலும் சிறிய அளவிலான பாதிப்புகள் ஏற்பட்டுள்ளன. இந்தச் சிரமத்திற்கு மன்னிப்பு கோரியுள்ள மைக்ரோசாப்ட் நிறுவனம், உயிர் காக்கும் சேவைகள் மற்றும் அரசுத் துறைகளின் செயல்பாடுகளை மீட்டெடுப்பதற்கு முன்னுரிமை அளித்து வருவதாகத் தெரிவித்துள்ளது.
பாதிக்கப்பட்ட சர்வர்களைப் படிப்படியாகச் சீரமைத்து வருவதாகவும், மாற்றுப் பாதைகள் வழியாக இணையப் போக்குவரத்தைத் திருப்பிவிட்டு சேவைகளை மீட்டெடுக்கும் பணிகள் தீவிரமாக நடைபெற்று வருவதாகவும் மைக்ரோசாப்ட் அறிவித்துள்ளது. எனினும், முதற்கட்டத் தொழில்நுட்பத் தீர்வுகள் எதிர்பார்த்த பலனை அளிக்காததால், அனைத்துச் சேவைகளும் முழுமையாக இயல்பு நிலைக்குத் திரும்ப இன்னும் சிறிது நேரம் ஆகலாம் எனக் கூறப்படுகிறது.
