உக்ரைன் - ரஷ்யா போர் தீவிரமடைந்து வரும் நிலையில், ரஷ்யத் தலைநகர் மாஸ்கோவில் இன்று (டிசம்பர் 24, 2025) நடந்த அடுத்தடுத்த குண்டுவெடிப்புச் சம்பவங்கள் அந்நாட்டைப் பெரும் அதிர்ச்சியில் ஆழ்த்தியுள்ளன. மாஸ்கோவின் எலெட்சுக்காயா (Yeletskaya) வீதியில் ரோந்துப் பணியில் ஈடுபட்டிருந்த போக்குவரத்து காவல்துறையினர், ஒரு சந்தேகத்திற்கிடமான நபரைக் கண்டு அவரைப் பிடிக்க முயன்றபோது, அந்த நபர் தன்னிடம் இருந்த வெடிகுண்டை வெடிக்கச் செய்துள்ளார். இந்த பயங்கரச் சம்பவத்தில் இளம் வயது காவலர்களான இலியா கிளிமனோவ் (24) மற்றும் மாக்சிம் கோர்புனோவ் (25) ஆகிய இருவர் சம்பவ இடத்திலேயே உயிரிழந்தனர். குண்டுவெடிப்பை நிகழ்த்திய அந்த மர்ம நபரும் இதில் உயிரிழந்ததாகத் தகவல்கள் தெரிவிக்கின்றன.
இந்தத் தாக்குதல் நடந்த இடம், கடந்த திங்கட்கிழமை ரஷ்ய ராணுவத்தின் மூத்த ஜெனரலான ஃபனில் சர்வாரோவ் (Fanil Sarvarov) கார் குண்டுவெடிப்பில் கொல்லப்பட்ட இடத்திற்கு மிக அருகிலேயே அமைந்துள்ளது என்பது குறிப்பிடத்தக்கது. 56 வயதான லெப்டினன்ட் ஜெனரல் ஃபனில் சர்வாரோவ், ரஷ்ய ராணுவத்தின் செயல்பாட்டுப் பயிற்சிப் பிரிவின் தலைவராக இருந்தவர். அவரது காரின் அடியில் வைக்கப்பட்டிருந்த வெடிகுண்டு வெடித்ததில் அவர் உயிரிழந்தார். ஒரே வாரத்தில் மாஸ்கோவின் முக்கியப் பகுதியில் நடத்தப்பட்ட இந்த இரண்டு தாக்குதல்களும் ரஷ்யாவின் உள்நாட்டுப் பாதுகாப்பிற்கு விடப்பட்ட பெரும் சவாலாகப் பார்க்கப்படுகிறது.
இந்தச் சம்பவம் குறித்து உக்ரைனின் ராணுவ உளவு அமைப்பான HUR வழங்கிய தகவல்கள் அதிரவைப்பதாக உள்ளன. உயிரிழந்த இரண்டு காவலர்களும் உக்ரைனுக்கு எதிரான போரில் பங்கேற்றவர்கள் என்றும், அவர்கள் உக்ரைன் போர்க்கைதிகளைத் சித்திரவதை செய்ததில் தொடர்புடையவர்கள் என்பதற்கான ஆதாரங்கள் இருப்பதாகவும் உக்ரைன் தரப்பு குற்றம் சாட்டியுள்ளது. ரஷ்ய அரசின் ஆக்கிரமிப்பு கொள்கைக்கு எதிர்ப்புத் தெரிவிக்கும் வகையில், அந்தப் பகுதியைச் சேர்ந்த ஒரு உள்ளூர்வாசியே இந்தத் தாக்குதலை நடத்தியதாக உக்ரைன் உளவுத்துறை வட்டாரங்கள் பிபிசி-யிடம் தெரிவித்துள்ளன. இந்தச் சம்பவத்தில் மேலும் இருவர் பலத்த காயமடைந்து மருத்துவமனையில் அனுமதிக்கப்பட்டுள்ளனர்.
இந்தத் தாக்குதல்களுக்குப் பின்னால் உக்ரைன் இருக்கலாம் என்று ரஷ்யா சந்தேகிக்கிறது. இருப்பினும், ஜெனரல் சர்வாரோவ் கொலைக்கு உக்ரைன் இதுவரை நேரடியாகப் பொறுப்பேற்கவில்லை. ஒரே வருடத்தில் மாஸ்கோவில் கொல்லப்படும் மூன்றாவது உயர் ராணுவ அதிகாரி சர்வாரோவ் ஆவார். தற்போது உயிரிழந்த காவலர் மாக்சிம் கோர்புனோவிற்கு ஒன்பது மாதக் குழந்தை இருப்பது சோகத்தை ஏற்படுத்தியுள்ளது. ரஷ்யாவின் புலனாய்வுக் குழுவினர் இச்சம்பவம் குறித்து விரிவான விசாரணையைத் தொடங்கியுள்ளனர். போர் முன்னணியில் மட்டுமல்லாமல், தலைநகர் மாஸ்கோவிற்குள்ளும் தற்போது தாக்குதல்கள் ஊடுருவி இருப்பது அதிபர் புதின் அரசுக்கு நெருக்கடியை ஏற்படுத்தியுள்ளது.