இங்கிலாந்தின் பிளாக்ஃபூல் (Blackpool) பகுதியில் உள்ள க்ளோசெஸ்டர் அவென்யூ (Gloucester Avenue) வீதியில், 16 வயது சிறுவன் ஒருவன் வெடிபொருட்களை வைத்திருந்ததாகக் கூறி லங்காஷயர் போலீசாரால் அதிரடியாகக் கைது செய்யப்பட்டுள்ளான். சட்ட காரணங்களுக்காக அச்சிறுவனின் பெயர் வெளியிடப்படவில்லை. அவனிடம் இருந்த மர்மப் பொருட்களைக் கண்டறிந்தவுடன், 'Explosives Act'-ன் கீழ் வழக்குப்பதிவு செய்த போலீசார், உடனடியாக வெடிபொருள் நிபுணர்களை (Explosive Ordnance Disposal - EOD) வரவழைத்து அந்த இடத்தைச் சோதனையிட்டனர். இதனால் அந்தப் பகுதி முழுவதும் பெரும் பதற்றம் நிலவியது.
இந்தச் சம்பவத்தைத் தொடர்ந்து, முன்னெச்சரிக்கை நடவடிக்கையாக அந்த வீதியைச் சுற்றியுள்ள ஏராளமான வீடுகள் காலி செய்யப்பட்டன (Evacuated). அங்கு வசிக்கும் மக்கள் பாதுகாப்பான இடங்களுக்கு மாற்றப்பட்டு, அவர்களுக்கு லங்காஷயர் காவல்துறையின் சிறப்பு அதிகாரிகள் ஆதரவு அளித்து வருகின்றனர். அந்தப் பகுதி முழுவதும் பலத்த பாதுகாப்பு வளையத்திற்குள் (Cordon) கொண்டுவரப்பட்டுள்ளது. பொதுமக்கள் அந்தப் பகுதிக்கு வருவதைத் தவிர்க்குமாறு காவல்துறையினர் கேட்டுக்கொண்டுள்ளனர்.
லங்காஷயர் காவல்துறையின் தலைமை ஆய்வாளர் மார்ட்டின் வியாட் (Chief Inspector Martin Wyatt) இதுகுறித்துத் தெரிவிக்கையில், "இந்த விவகாரத்தில் பொதுமக்களின் பாதுகாப்புதான் எங்களுக்கு மிக முக்கியம். அவசரக்கால சேவைகள் (Emergency Services) அனைத்தும் தயார் நிலையில் உள்ளன. குடியிருப்பாளர்கள் எங்களுக்கு அளிக்கும் ஒத்துழைப்புக்கு நன்றி தெரிவித்துக் கொள்கிறோம்," என்று கூறினார். அந்த இடத்தைச் சோதனையிட்டு முழுமையாகப் பாதுகாப்பானதாக (Make the address safe) மாற்றுவதற்கு லங்காஷயர் தீயணைப்பு மற்றும் மீட்புப் படையினரும் களமிறக்கப்பட்டுள்ளனர்.
சிறுவன் எதற்காக இவ்வளவு ஆபத்தான வெடிபொருட்களை வைத்திருந்தான்? இதன் பின்னணியில் ஏதேனும் சதித்திட்டம் (Terror plot) உள்ளதா? அல்லது இது ஒரு தனிப்பட்ட நடவடிக்கையா? என்ற கோணத்தில் ரகசிய புலனாய்வுப் பிரிவு போலீசார் விசாரணையைத் தீவிரப்படுத்தியுள்ளனர். 2026 புத்தாண்டு கொண்டாட்டங்களுக்கு நாடு தயாராகி வரும் வேளையில், இதுபோன்ற ஒரு சம்பவம் நடந்திருப்பது இங்கிலாந்து வாழ் மக்களிடையே அச்சத்தையும் பரபரப்பையும் ஏற்படுத்தியுள்ளது.