நள்ளிரவில் நடுக்கடலில் நடுக்கம்! பிலிப்பைன்சில் மூழ்கிய பிரம்மாண்ட சொகுசு படகு:

நள்ளிரவில் நடுக்கடலில் நடுக்கம்! பிலிப்பைன்சில் மூழ்கிய பிரம்மாண்ட சொகுசு படகு: 18 உடல்கள் மீட்பு - மாயமானவர்களின் கதி என்ன?




பிலிப்பைன்ஸ் நாட்டின் தெற்குப் பகுதியில் அமைந்துள்ள பேசிலன் (Basilan) மாகாண கடல் பகுதியில், 'எம்.வி. திரிஷா கெர்ஸ்டின் 3' (MV Trisha Kerstin 3) என்ற பயணிகள் படகு எதிர்பாராத விதமாக கடலில் மூழ்கி விபத்துக்குள்ளானது. இந்த கோர விபத்தில் இதுவரை 18 பேர் உயிரிழந்துள்ளதாக உறுதிப்படுத்தப்பட்டுள்ளது. நள்ளிரவில் மக்கள் ஆழ்ந்த உறக்கத்தில் இருந்தபோது நிகழ்ந்த இந்தத் துயரம் அந்த நாடே நிலைகுலையச் செய்துள்ளது.

விபத்துக்குள்ளான இந்த படகு சாம்போங்கா (Zamboanga) நகரில் இருந்து ஜோலோ (Jolo) தீவை நோக்கி சுமார் 350-க்கும் மேற்பட்ட பயணிகளுடன் சென்றுகொண்டிருந்தது. நள்ளிரவு சுமார் 1:50 மணியளவில் பாலுக்கு-பாலுக்கு (Baluk-Baluk) தீவு அருகே சென்றபோது, படகு திடீரென கடலுக்குள் மூழ்கத் தொடங்கியது. படகில் இருந்த பயணிகள் என்ன நடக்கிறது என்று தெரிவதற்குள்ளேயே நீர் சூழ்ந்ததால், உயிருக்குப் பயந்து அலறியபடி கடலில் குதித்துள்ளனர்.

கடலோர காவல்படை மற்றும் உள்ளூர் மீட்புக் குழுவினர் உடனடியாக களத்தில் இறங்கி போர்க்கால அடிப்படையில் மீட்புப் பணிகளை மேற்கொண்டனர். இதுவரை 317 பயணிகள் பாதுகாப்பாக மீட்கப்பட்டுள்ளனர். எனினும், உயிரிழந்த 18 பேரின் உடல்கள் மீட்கப்பட்டுள்ள நிலையில், 10-க்கும் மேற்பட்ட பயணிகள் இன்னும் கண்டுபிடிக்கப்படவில்லை. மாயமானவர்களைத் தேடும் பணியில் ஹெலிகாப்டர்கள் மற்றும் அதிவேகப் படகுகள் ஈடுபடுத்தப்பட்டுள்ளன.

விபத்து நடந்த சமயத்தில் கடல் சீற்றம் அதிகமாக இருந்ததாகவும், ராட்சத அலைகள் மோதியதால் படகின் அடிப்பகுதியில் ஓட்டை விழுந்து தண்ணீர் புகுந்திருக்கலாம் என்றும் முதற்கட்ட விசாரணையில் உயிர் பிழைத்தவர்கள் தெரிவித்துள்ளனர். இருப்பினும், படகு அதன் கொள்ளளவைத் தாண்டி பயணிகளை ஏற்றிச் சென்றதா அல்லது தொழில்நுட்பக் கோளாறு காரணமா என்பது குறித்து கடலோர காவல்படை தீவிர விசாரணை நடத்தி வருகிறது.

7,000-க்கும் மேற்பட்ட தீவுகளைக் கொண்ட பிலிப்பைன்ஸில், கடல் போக்குவரத்து மிக முக்கியமானது என்றாலும், அங்கு போதிய பாதுகாப்பு விதிமுறைகள் பின்பற்றப்படாதது தொடர்கதையாகி வருகிறது. இந்த 'திரிஷா கெர்ஸ்டின் 3' விபத்து, கடந்த காலங்களில் நடந்த பெரிய கடல் விபத்துகளை மீண்டும் நினைவுபடுத்தியுள்ளது. மாயமானவர்களை உயிருடன் மீட்க வேண்டும் என்ற பிரார்த்தனையுடன் உறவினர்கள் கடற்கரையில் கண்ணீருடன் காத்திருக்கின்றனர்.