அமெரிக்க அதிபர் டொனால்ட் ட்ரம்ப், கிரீன்லாந்தை வாங்கும் விவகாரத்தில் தற்போது ஐரோப்பிய நாடுகளுக்கு எதிராகத் தனது 'டாரீஃப்' (Tariff) ஆயுதத்தைக் கையில் எடுத்துள்ளார். குறிப்பாகப் பிரிட்டன், டென்மார்க் உள்ளிட்ட 8 நாடுகள் கிரீன்லாந்து விவகாரத்தில் அமெரிக்காவுக்கு ஒத்துழைக்கவில்லை என்றால், அந்த நாடுகளின் இறக்குமதிப் பொருட்கள் மீது கடும் வரி விதிக்கப்படும் எனத் தனது 'டிரூத் சோஷியல்' (Truth Social) பக்கத்தில் அதிகாரப்பூர்வமாக அறிவித்துள்ளார்.
இந்த அதிரடித் திட்டத்தின்படி, வரும் பிப்ரவரி 1, 2026 முதல் பிரிட்டன், டென்மார்க், பிரான்ஸ், ஜெர்மனி உள்ளிட்ட நாடுகளின் பொருட்களுக்கு 10 சதவீத வரி விதிக்கப்படும். அதன் பிறகும் கிரீன்லாந்தை விற்க அந்த நாடுகள் சம்மதிக்கவில்லை என்றால், ஜூன் 1 முதல் இந்த வரி 25 சதவீதமாக உயர்த்தப்படும் என ட்ரம்ப் எச்சரித்துள்ளார். "உலக அமைதி இப்போ ஆபத்துல இருக்கு, கிரீன்லாந்தை நாம வாங்கலைன்னா சீனா அல்லது ரஷ்யா அதைக் கைப்பற்றிடும்" எனத் தனது வழக்கமான பாணியில் 'நேஷனல் செக்யூரிட்டி' (National Security) காரணத்தைச் சொல்லியிருக்கிறார் ட்ரம்ப்.
சமீபத்தில் பிரிட்டன் தனது ராணுவ அதிகாரிகளை கிரீன்லாந்துக்கு அனுப்பி, டென்மார்க்கின் பாதுகாப்புக்கு ஆதரவு தெரிவித்திருந்தது ட்ரம்ப்பை செம காண்டாக்கியுள்ளது. "நாங்க இவ்வளவு காலம் உங்களுக்குப் பாதுகாப்பு கொடுத்திருக்கோம், இப்போ டென்மார்க் எங்களுக்குத் திருப்பி கொடுக்க வேண்டிய நேரம் வந்துடுச்சு" என ட்ரம்ப் ட்வீட் போட்டுள்ளார். 'லாக் அண்ட் லோடட்' (Locked and Loaded) என்று சொல்லும் அளவுக்கு இந்த விவகாரத்தில் ராணுவ நடவடிக்கையை எடுக்கவும் தான் தயார் என்பதை அவர் மறைமுகமாக உணர்த்தியுள்ளார்.
ஆனால், டென்மார்க் பிரதமர் மெட்டே பிரடெரிக்சன் (Mette Frederiksen), "கிரீன்லாந்து ஒன்றும் விற்பனைக்கு அல்ல" எனத் திட்டவட்டமாகத் தெரிவித்துள்ளார். அமெரிக்காவின் இந்த மிரட்டலால் ஐரோப்பிய சந்தைகளில் பெரும் பதற்றம் ஏற்பட்டுள்ளது. ஒருவேளை இந்த வரி அமலுக்கு வந்தால், பிரிட்டன் உள்ளிட்ட நாடுகளின் பொருளாதாரம் பெரும் சரிவைச் சந்திக்கும் எனக் கூறப்படுகிறது. ட்ரம்ப்பின் இந்த 'கிரீன்லாந்து டீல்' உலக நாடுகளுக்கிடையே ஒரு புதிய வர்த்தகப் போரை (Trade War) உருவாக்கும் போலத் தெரிகிறது!
