"நான் செத்துட்டேனா?": வதந்திகளுக்கு காபி ஷாப்பில் நின்றபடி அதிரடி பதில் அளித்த நேதன்யாகு!

இஸ்ரேல் - ஈரான் இடையே போர் தீவிரமடைந்துள்ள நிலையில், இஸ்ரேல் பிரதமர் பெஞ்சமின் நேதன்யாகு கொல்லப்பட்டதாகச் சமூக வலைதளங்களில் கடந்த சில நாட்களாகத் தகவல்கள் வைரலாகப் பரவின. குறிப்பாக, சமீபத்தில் அவர் வெளியிட்ட காணொளி ஒன்றில் அவரது கையில் ஆறு விரல்கள் தெரிவதாகவும், அது செயற்கை நுண்ணறிவு (AI) மூலம் உருவாக்கப்பட்ட போலியான காணொளி என்றும் கூறி, அவரது உயிருக்கு ஆபத்து ஏற்பட்டுள்ளதாகப் பலரும் வதந்திகளைக் கிளப்பினர். இந்தச் சலசலப்புகளுக்கு முற்றுப்புள்ளி வைக்க, நேதன்யாகு ஞாயிற்றுக்கிழமை ஒரு புதிய காணொளியை வெளியிட்டுள்ளார்.

ஜெருசலேம் நகரின் புறநகர்ப் பகுதியில் உள்ள ஒரு காபி ஷாப்பிற்குச் சென்ற நேதன்யாகு, அங்கிருந்தபடி அந்த விடியோவைப் பதிவு செய்தார். காபியைப் பருகியபடி, "எனக்கு காபி குடிக்க வேண்டும் என்று மிகவும் ஆசையாக (ஆங்கிலத்தில் ‘dying for coffee’ என்ற சொல்லாடலைப் பயன்படுத்தி) உள்ளது" என்று நகைச்சுவையாகத் தொடங்கிய அவர், வதந்திகளைப் பரப்பியவர்களுக்குப் பதிலடி கொடுத்தார். "நான் எங்கே இருக்கிறேன் என்று கேட்கிறீர்களா? இதோ காபி ஷாப்பில் இருக்கிறேன். நான் உயிருடன் தான் இருக்கிறேன்" என்பதைத் தனது நடவடிக்கையின் மூலம் அவர் உறுதிப்படுத்தினார்.

சமூக வலைதளங்களில் பரவிய ‘ஆறு விரல்கள்’ விவகாரத்திற்குப் பதிலளிக்கும் வகையில், தனது இரு கைகளையும் கேமரா முன் உயர்த்தி, "நீங்கள் என் விரல்களை எண்ண வேண்டுமா? இதோ பாருங்கள், சரியாகத்தான் இருக்கின்றன" என்று கூறி வதந்திகளை அப்பட்டமாகப் பொய் என நிரூபித்தார். இது வெறும் கேமரா கோணங்களால் ஏற்பட்ட மாயை என்பதை அவர் மறைமுகமாகச் சுட்டிக்காட்டினார். தனது நாட்டு மக்கள் காட்டும் மன உறுதியே தனக்கு வலிமை தருவதாகவும், போர்ச் சூழலில் மக்கள் பாதுகாப்பு விதிமுறைகளைப் பின்பற்ற வேண்டும் என்றும் அவர் கேட்டுக்கொண்டார்.

போர் நடந்து கொண்டிருக்கும் வேளையில், எதிரி நாடுகளும் சமூக வலைதளங்களில் பரவும் தவறான தகவல்களும் குழப்பத்தை ஏற்படுத்த முயற்சிப்பதாக இஸ்ரேல் அரசு ஏற்கனவே எச்சரித்திருந்தது. பிரதமர் நேதன்யாகுவின் இந்த அதிரடி பதில், வதந்திகளுக்கு ஒரு முற்றுப்புள்ளியை வைத்துள்ளதோடு, அவர் தொடர்ந்து தனது பணிகளைச் செய்து வருகிறார் என்பதையும் உலகுக்குத் தெளிவுபடுத்தியுள்ளது. தற்போது இஸ்ரேல் - ஈரான் போர் மூன்றாவது வாரமாகத் தொடரும் நிலையில், பிரதமரின் இந்தச் செயல் பொதுமக்களிடையே நம்பிக்கையை ஏற்படுத்தியுள்ளது.