தமிழ்நாடு சட்டமன்றத் தேர்தலின் போது தமிழக வெற்றிக் கழகம் (தவெக) அளித்த மிக முக்கியமான மற்றும் கவர்ச்சிகரமான தேர்தல் வாக்குறுதிகளில் ஒன்றான “தாய்மாமன் தங்க மோதிரம் திட்டம்” செயல்படுத்துவதற்கான அதிகாரப்பூர்வ அரசாணையைத் தமிழக அரசு வெளியிட்டுள்ளது. தவெக தலைவர் மற்றும் முதலமைச்சர் சி. ஜோசப் விஜய்யின் 52-வது பிறந்தநாளை முன்னிட்டு (ஜூன் 22) இந்த மெகா அறிவிப்பை மருத்துவம் மற்றும் மக்கள் நல்வாழ்வுத்துறை வெளியிட்டுள்ளது. தமிழகத்தில் அரசு மருத்துவமனைகளில் பிறக்கும் ஒவ்வொரு குழந்தைக்கும் அரசு சார்பில் 1 கிராம் எடையுள்ள தங்க மோதிரம் மற்றும் பேபி வெல்கம் கிட் (Baby Welcome Kit) பரிசாக வழங்கப்படும் என்று அறிவிக்கப்பட்டுள்ளது.
தமிழர் பண்பாட்டின்படி, ஒரு குடும்பத்தில் குழந்தை பிறந்தால் தாய்மாமன் தங்கம் மற்றும் சீர்வரிசைகளை வழங்கி வரவேற்பது மரபாகும். இந்த உன்னத பண்பாட்டு மரபைப் பிரதிபலிக்கும் வகையில், தமிழக அரசே இனி மாநிலத்தில் பிறக்கும் ஒவ்வொரு குழந்தைக்கும் “தாய்மாமன்” என்ற அந்தஸ்தில் நின்று அன்போடு ஒரு கிராம் தங்க மோதிரத்தை வழங்கி வரவேற்கும் என்று அரசாணையில் மிக நெகிழ்ச்சியாகக் குறிப்பிடப்பட்டுள்ளது. தமிழ்நாட்டில் நிரந்தரமாக வசித்து வரும் குடும்பங்களைச் சேர்ந்த, அரசு மருத்துவமனைகளில் பிரசவிக்கும் அனைத்துத் தாய்மார்களின் குழந்தைகளுக்கும் இத்திட்டம் முழுமையாகப் பொருந்தும் எனத் தெரிவிக்கப்பட்டுள்ளது.
இந்த பிரம்மாண்டமான சமூக நலத்திட்டத்தை மாநிலம் முழுவதும் வெற்றிகரமாகச் செயல்படுத்துவதற்காக, தவெக அரசு ஆண்டுதோறும் ₹755.83 கோடி ரூபாய் நிதியை பிரத்யேகமாக ஒதுக்கீடு செய்துள்ளது. இத்திட்டத்திற்கான முதற்கட்ட ஒப்பந்தப் புள்ளிகளை (Tenders) உடனடியாகக் கோருமாறு அதிகாரிகளுக்கு முதலமைச்சர் விஜய் உத்தரவிட்டுள்ளார். முதல்வர் விஜய்யின் பிறந்தநாளான ஜூன் 22, 2026 முதல் அரசு மருத்துவமனைகளில் பிறக்கும் அனைத்துக் குழந்தைகளும் இத்திட்டத்தின் கீழ் பயன்பெறத் தகுதியானவர்கள் என்று அறிவிக்கப்பட்டுள்ள நிலையில், பேரறிஞர் அண்ணாவின் பிறந்த நாளான வரும் செப்டம்பர் 15, 2026 அன்று இந்தத் திட்டத்தை முதலமைச்சர் விஜய் அதிகாரப்பூர்வமாகத் தொடங்கி வைக்க உள்ளார்.
முன்னதாக, தமிழ்நாட்டின் தற்போதைய கடன் சுமையைக் காரணம் காட்டி, தவெக அரசு தனது தேர்தல் வாக்குறுதிகளான பெண்களுக்கு இலவசப் பேருந்து பயணம், மாத உதவித்தொகை மற்றும் தாய்மாமன் சீர் போன்ற திட்டங்களை நிறைவேற்ற முடியாது என்று எதிர்க்கட்சிகள் கடுமையான விமர்சனங்களை முன்வைத்து வந்தன. அவற்றுக்கெல்லாம் முற்றுப்புள்ளி வைக்கும் விதமாக, தவெக அரசு பொறுப்பேற்ற 40 நாட்களுக்குள் இந்த மெகா திட்டத்திற்கான அரசாணையை வெளியிட்டு, தனது பிறந்தநாள் பரிசாகத் தமிழக மக்களுக்கு முதல்வர் விஜய் அதிரடி காட்டியுள்ளார். இந்த அறிவிப்பு தவெக தொண்டர்கள் மற்றும் பொதுமக்கள் மத்தியில் பெரும் வரவேற்பைப் பெற்றுள்ளது.
