தமிழக முதலமைச்சர் சி. ஜோசப் விஜய் தலைமையிலான தவெக அரசை நிலைகுலையச் செய்ய, தவெக சட்டமன்ற உறுப்பினர்களைக் (MLA) கோடிக்கணக்கான ரூபாய் பணத்தாசை காட்டி வளைக்க முயன்ற “குதிரை பேர” வழக்கில் அதிர்ச்சி திருப்பங்கள் அரங்கேறி வருகின்றன. இந்த இமாலய சதித் திட்டத்தில் தொடர்புடையதாகக் கூறப்படும் முன்னாள் திமுக அமைச்சரும், தற்போதைய கோவை தெற்கு தொகுதி எம்.எல்.ஏ-வுமான வி. செந்தில் பாலாஜியின் தம்பி வி. அசோக் குமார் தற்பொழுது காவல்துறையினரால் கைது செய்யப்படுவதைத் தவிர்க்கத் தலைமறைவாகியுள்ளார். தவெக எம்.எல்.ஏ டாக்டர் என். இளையராஜாவிடம் ரூ.35 கோடி பேரம் பேசிய வழக்கில், இடைத்தரகர்களை இயக்கிய பின்னணியில் அசோக் குமாருக்கு நேரடித் தொடர்பு இருப்பது உறுதியானதால், அவரைப் பிடிக்கச் சென்னை மற்றும் கரூர் காவல்துறையினர் தனிப்படைகள் அமைத்துத் தீவிரத் தேடுதல் வேட்டையில் இறங்கியுள்ளனர்.
காவல்துறை மற்றும் உளவுத்துறை வட்டாரங்களின் ரகசியத் தகவல்களின்படி, தவெக புதிய அரசுப் பொறுப்பேற்ற உடனேயே இந்த ஆபரேஷன் திரைமறைவில் தொடங்கப்பட்டுவிட்டது தெரியவந்துள்ளது. தவெக சட்டமன்ற உறுப்பினர்களின் முதல் அதிகாரப்பூர்வக் கூட்டத்தின்போது, அக்கட்சியின் உட்கட்டமைப்பை வலுப்படுத்த “ஒருவருக்கு ஒரு பதவி” என்ற அடிப்படையில் ‘எம்.எல்.ஏ-வாக இருப்பவர்கள் மாவட்ட செயலாளர்களாக இருக்கக் கூடாது; அதேபோல் மாவட்ட செயலாளர்களாக இருப்பவர்கள் எம்.எல்.ஏ-க்களாக நீடிக்கக் கூடாது’ என்ற அதிரடி விதிமுறை கொண்டுவரப்பட்டது. இதன்காரணமாக, தேர்தலில் பெரும் தொகை செலவழித்து வெற்றி பெற்ற சில எம்.எல்.ஏ-க்கள் மத்தியில் ஏற்பட்ட அதிருப்தி மற்றும் மனக் குமுறல்களை மிகச் சரியாகப் பயன்படுத்திக் கொண்ட “கரூர் கம்பெனி” தரப்பு, தவெக-வின் உட்கட்சிப் பூசலைத் தங்களுக்குச் சாதகமாக மாற்றி ஆட்சியைக் கவிழ்க்கக் கணக்கு போட்டது தற்பொழுது அம்பலமாகியுள்ளது.
சமீபத்தில் நடந்து முடிந்த தமிழகச் சட்டமன்றக் கூட்டத்தொடரின்போதே, சபாநாயகருக்கு எதிராக திடீரென நம்பிக்கை இல்லாத் தீர்மானம் (No Confidence Motion) கொண்டுவந்து, அதிருப்தி தவெக எம்.எல்.ஏ-க்களை அதற்கு ஆதரவாக வாக்களிக்க வைத்து, விஜய்யின் ஆட்சியைச் சரித்துவிட திமுக மற்றும் அதிமுக பின்னணியில் உள்ள முக்கியப் புள்ளிகள் திட்டமிட்டிருந்ததாகக் கூறப்படுகிறது. இதற்காகத் தோராயமாக 10 முதல் 12 தவெக எம்.எல்.ஏ-க்களிடம் ரகசியமாகப் பேச்சுவார்த்தை நடத்தப்பட்டதாகவும், அதில் சுமார் 7 முதல் 8 சட்டமன்ற உறுப்பினர்கள் தொடக்கத்தில் இவர்களின் வலைக்குள் விழும் நிலைக்குச் சென்றதாகவும் அதிர்ச்சித் தகவல்கள் வெளியாகியுள்ளன. இந்த ஆபத்தான நகர்வுகளைத் தவெக தலைமை மற்றும் மாநில உளவுத்துறை (Intelligence) தொடர்ந்து கண்காணித்து வந்த நிலையில், எல்லை மீறிப் போன பேர விவகாரங்களை ஆதாரங்களுடன் தவெக தரப்பு கையில் எடுத்தது.
இந்த நிலையில்தான், தன்னைத் தொடர்ந்து டார்ச்சர் செய்து, ரூ.35 கோடிக்கு விலைபோகச் சொல்லி வற்புறுத்திய இடைத்தரகர் திருநாவுக்கரசு என்பவருக்கு எதிராக உத்தங்கரை தொகுதி தவெக எம்.எல்.ஏ டாக்டர் இளையராஜா சென்னை காவல் ஆணையரிடம் துணிச்சலுடன் புகார் அளித்தார். தவெக-வுக்கு விசுவாசமாகத் தான் மறுப்பு தெரிவித்ததால், தனது குடும்பத்தையே மொத்தமாகக் கொலை செய்துவிடுவதாக மிரட்டியதாகவும் அவர் புகாரில் குறிப்பிட்டிருந்தார். இதன் அடிப்படையில் திருநாவுக்கரசு, நரேஷ், தியாகராஜன் ஆகிய 3 பேரை திருவல்லிக்கேணி போலீசார் கைது செய்து நடத்திய விசாரணையில், செந்தில் பாலாஜி மற்றும் அவரது தம்பி அசோக் குமார் ஆகியோரின் நேரடிப் பரிந்துரையின் பேரில்தான் இந்த டீலிங் பேசப்பட்டது என்ற வாக்குமூலம் சிக்கியுள்ளது. இதன் காரணமாக, இந்த வழக்கில் முதன்மைச் சூத்திரதாரியாகக் கருதப்படும் அசோக் குமார் எந்த நேரத்திலும் கைது செய்யப்படலாம் என்பதால் தமிழக அரசியல் களம் தற்பொழுது உச்சகட்ட பதற்றத்தில் உள்ளது.
