தமிழகத்தில் முதலமைச்சர் சி. ஜோசப் விஜய் தலைமையிலான தவெக அரசுக்கு எதிராகச் சட்டமன்றத்தில் சபாநாயகர் மீது நம்பிக்கை இல்லாத் தீர்மானம் கொண்டு வந்து, ஆட்சியைத் தொடக்கத்திலேயே கவிழ்க்க எதிர்க்கரங்கள் முயன்ற விவகாரம் பூதாகரமாக வெடித்துள்ளது. உத்தங்கரை தொகுதி தவெக எம்.எல்.ஏ டாக்டர் என். இளையராஜா கொடுத்த புகாரின் பேரில் 3 பேர் கைது செய்யப்பட்டுள்ள நிலையில், இந்த நெட்வொர்க் தவெக கட்சியைச் சேர்ந்த சுமார் 10 முதல் 12 சட்டமன்ற உறுப்பினர்களைக் குறிவைத்து வலைவீசிய அதிர்ச்சித் தகவல் சென்னை மாநகரக் காவல் துறையின் முதற்கட்ட விசாரணையில் தற்பொழுது வெளிச்சத்திற்கு வந்துள்ளது.
காவல்துறையின் ரகசிய விசாரணையின்படி, தவெக உட்கட்சியில் எம்.எல்.ஏ-க்களுக்கு ‘ஒரே நபர் ஒரே பதவி’ என்ற அடிப்படையில் மாவட்டச் செயலாளர் பொறுப்புகள் மறுக்கப்பட்டதால் லேசான அதிருப்தியில் இருந்த சில குறிப்பிட்ட நபர்களைப் பட்டியலிட்டு இந்த சதி அரங்கேறியுள்ளது. குறிப்பாக, கிருஷ்ணகிரி, தருமபுரி, கரூர், மற்றும் திருச்சி மாவட்டங்களைச் சேர்ந்த தவெக சட்டமன்ற உறுப்பினர்களிடம் இடைத்தரகர்கள் மூலமாகப் பேச்சவார்த்தை நடத்த முயன்றுள்ளனர். உளவுத்துறை சேகரித்த டிஜிட்டல் ஆதாரங்கள் மற்றும் கைதானவர்களிடம் நடத்தப்பட்ட விசாரணையின் அடிப்படையில், எந்தெந்த எம்.எல்.ஏ-க்கள் இந்த பேர நெட்வொர்க்கால் தொடர்ந்து தொடர்புகொள்ளப்பட்டார்கள் என்ற பட்டியல் தற்போது போலீஸ் வசம் சிக்கியுள்ளது.
இந்த ஆபரேஷனின் முக்கியப் புள்ளியாகக் கருதப்படும் முன்னாள் திமுக அமைச்சர் வி. செந்தில் பாலாஜியின் தம்பி வி. அசோக் குமார் மற்றும் கைதான திருச்சி நரேஷ் ஆகியோரின் செல்போன் அழைப்பு விவரங்கள் (CDR) மற்றும் வாட்ஸ்அப் உரையாடல்களைப் போலீசார் தீவிரமாக ஆய்வு செய்து வருகின்றனர். இதில், ரூ.35 கோடி வரை பேரம் பேசப்பட்ட இளையராஜாவைத் தவிர, மேலும் சில தவெக எம்.எல்.ஏ-க்களிடமும் வெவ்வேறு தொகைகளைக் குறிப்பிட்டு இடைத்தரகர்கள் பேசி வந்ததும், அதற்குச் சில எம்.எல்.ஏ-க்கள் கடுமையாக மறுப்பு தெரிவித்ததும் தெரியவந்துள்ளது. இந்த ரகசியப் பட்டியலில் உள்ள மற்ற தவெக எம்.எல்.ஏ-க்களிடமும் சாட்சியாக வாக்குமூலம் பெறத் தனிப்படை போலீசார் திட்டமிட்டுள்ளனர்.
தவெக அரசைத் வீழ்த்தத் திட்டமிட்ட இந்த விவகாரத்தில், கைதானவர்கள் கொடுத்த வாக்குமூலத்தின் அடிப்படையில் விசாரணை வளையம் மேலும் விரிவடைந்து கொண்டே செல்கிறது. தற்பொழுது தலைமறைவாகியுள்ள அசோக் குமாரைக் கைது செய்து விசாரித்தால் மட்டுமே, இந்த குதிரை பேரச் சதியின் பின்னணியில் இருந்த முழுமையான எதிர்க்கட்சிப் புள்ளிகள் யார் மற்றும் எந்தெந்த தவெக எம்.எல்.ஏ-க்கள் இவர்களது ஆசை வார்த்தைகளுக்கு இணங்க மறுத்து தலைமைக்கு உண்மையாக இருந்தார்கள் என்ற முழு விவரமும் அதிகாரப்பூர்வமாக வெளியாகும் என்பதால், தமிழக அரசியலில் இந்த வழக்கு பெரும் பரபரப்பை ஏற்படுத்தியுள்ளது.
