Author: Kannan Dateline: Caracas | July 2, 2026
வெனிசுலா கடந்த வாரம் அனுபவித்த இரண்டு தொடர்ச்சியான உயிரிழப்பு நிலநடுக்கங்களின் அதிர்ச்சியில் இருந்து மீளாத நிலையில், ஜூன் 30 அன்று தலைநகர் கராகஸ் மற்றும் அதன் சுற்றுவட்டாரங்களில் வானம் திடீரென இரத்த சிவப்பு நிறத்தில் மாறியது. சூரியன் மறையும் நேரத்தில் வானம் முழுவதும் பரவிய தீவிர சிவப்பு ஒளி, அங்குள்ள மக்களிடையே பெரும் அச்சத்தையும் குழப்பத்தையும் ஏற்படுத்தியது.
சமூக வலைதளங்களில் பகிரப்பட்ட வீடியோக்கள் மற்றும் புகைப்படங்களில், வானம் முழுவதும் பரவிய சிவப்பு ஒளி “அபூர்வம்”, “அச்சமூட்டும் காட்சி”, “இயற்கையின் எச்சரிக்கை” என பல்வேறு கருத்துகளை கிளப்பியது. குறிப்பாக, சமீபத்திய நிலநடுக்கத்துடன் இந்த நிகழ்வு தொடர்புடையதா என்ற கேள்வி பலரிடமும் எழுந்தது. சிலர் இதை ‘earthquake lights’ எனப்படும் மர்மமான ஒளி நிகழ்வாகக் கருதினர்.
மற்றொரு பகுதி மக்கள், இந்த சிவப்பு வானத்தை பைபிளில் வரும் Joel 2:30-31 வசனத்துடன் இணைத்து, “இது கடவுளின் தீர்ப்பின் நாள் வருவதை குறிக்கும் அறிகுறியா?” என விவாதித்தனர். அந்த வசனத்தில், “வானத்திலும் பூமியிலும் அதிசயங்களை காட்டுவேன்; இரத்தமும் நெருப்பும் புகை தூண்களும்… சூரியன் இருளாகவும் சந்திரன் இரத்தமாகவும் மாறும்” என குறிப்பிடப்படுவது, இந்த நிகழ்வை மேலும் மர்மமாக மாற்றியது.
ஆனால் நிபுணர்கள் இந்த அச்சத்தை உடனடியாக தணித்தனர். அவர்கள் கூறியதாவது: “இது எந்த மர்ம சக்தியாலும், நிலநடுக்கத்தாலும், பைபிள் அறிகுறியாலும் ஏற்படும் நிகழ்வு அல்ல. இது முற்றிலும் இயற்கையான ஒளி பரவல்.”
வெனிசுலாவில் இதை ‘candilazo’ என அழைக்கின்றனர். குறிப்பிட்ட நேரத்தில், குறிப்பிட்ட கோணத்தில் சூரிய ஒளி வளிமண்டலத்தில் உள்ள தூசி, ஈரப்பதம் மற்றும் சிறு துகள்களுடன் கலக்கும் போது, வானம் தீ சிவப்பு நிறத்தில் மாறும். இது ஒரு இயற்கையான சூரிய அஸ்தமன நிகழ்வு.
மேலும், தற்போது சஹாரா பாலைவனத்திலிருந்து கரீபியன் மற்றும் வட தென் அமெரிக்காவுக்கு பெரிய அளவில் தூசி மேகம் நகர்ந்து வருகிறது. இந்த Saharan Dust Plume, சூரிய உதயம் மற்றும் அஸ்தமன நேரங்களில் வானத்தை சிவப்பு, ஆரஞ்சு, தங்க நிறங்களில் மாற்றும். வெனிசுலாவில் காணப்பட்ட சிவப்பு வானம் இந்த தூசி மேகத்தால் மேலும் தீவிரமாகியிருக்கலாம் என நிபுணர்கள் கூறுகின்றனர்.
அங்குள்ள வானிலை ஆய்வு மையம் வெளியிட்ட அறிக்கையில், “இந்த சிவப்பு வானம் முற்றிலும் இயற்கையானது. இது நிலநடுக்கத்துடன் எந்த தொடர்பும் இல்லை. மக்கள் அச்சப்பட வேண்டிய அவசியமில்லை” என தெரிவித்துள்ளது.
எனினும், சமூக வலைதளங்களில் இந்த நிகழ்வு இன்னும் விவாதத்திற்குரியதாகவே உள்ளது. சிலர் இதை அழகான இயற்கை காட்சியாக ரசிக்க, மற்றவர்கள் இதை வரவிருக்கும் பேரழிவின் அறிகுறி என கருதுகின்றனர். உயிரிழப்பு நிலநடுக்கத்துக்குப் பிறகு ஏற்பட்ட இந்த சிவப்பு வானம், அங்குள்ள மக்களின் மனநிலையை மேலும் பாதித்துள்ளது என்பது மறுக்க முடியாத உண்மை.
மொத்தத்தில், வெனிசுலாவில் ஏற்பட்ட இந்த “இரத்த சிவப்பு வானம்” உலகளாவிய கவனத்தை ஈர்த்தாலும், நிபுணர்கள் இது ஒரு இயற்கையான வளிமண்டல நிகழ்வு என்பதை தெளிவுபடுத்தியுள்ளனர். அங்குள்ள மக்கள் அச்சத்திலிருந்து மீள, அதிகாரிகள் தொடர்ந்து விளக்கங்களை வழங்கி வருகின்றனர்.
