தமிழகத்தின் சாலை மற்றும் உள்கட்டமைப்பு வசதிகளை சர்வதேச தரத்திற்கு உயர்த்தும் நோக்கில், மாநில நெடுஞ்சாலைத் துறையின் அடுத்த 10 ஆண்டுகளுக்கான பிரம்மாண்ட ‘மாஸ்டர் பிளான்’ தயாரிக்கும் பணிகள் தீவிரமடைந்துள்ளன. முதல்வர் விஜய் தலைமையிலான அரசு, ‘வெற்றித்தமிழகம்’ என்ற தொலைநோக்கு பார்வையின் கீழ் இந்த முக்கிய திட்டத்தை வடிவமைத்துள்ளது. அடுத்த ஐந்து ஆண்டுகளில் தமிழகத்தை அனைத்து துறைகளிலும் முதன்மை மாநிலமாக மாற்றும் நோக்கில், இத்திட்டங்கள் மூன்று கட்டங்களாக பிரிக்கப்பட்டு மிக துரிதமாக செயல்படுத்தப்பட உள்ளன.
இந்த புதிய போக்குவரத்து திட்டத்தில் சாலை பாதுகாப்பிற்கு மிக முக்கியத்துவம் அளிக்கப்பட்டுள்ளது. விபத்துகளற்ற பாதுகாப்பான போக்குவரத்தை உறுதி செய்ய ‘பாதுகாப்பான சாலைகள்’ என்ற திட்டத்தின் கீழ் முதற்கட்டமாக ₹500 கோடி ஒதுக்கீடு செய்யப்பட உள்ளது. இதன் சிறப்பம்சமாக, சாலைகளில் நடக்கும் போக்குவரத்து விதிமீறல்களை உடனுக்குடன் கண்டறிந்து தடுக்க செயற்கை நுண்ணறிவு (AI) தொழில்நுட்ப கேமராக்கள் மற்றும் அமைப்புகள் நிறுவப்பட உள்ளன. மேலும், விபத்து காலங்களில் உடனடியாக உயிர்காக்க அவசர மருத்துவப் பராமரிப்பு மையங்களும் அமைக்கப்படவுள்ளன.
பொதுமக்களின் பயன்பாட்டில் உள்ள ‘நம்ம சாலை’ மொபைல் செயலி முற்றிலும் மேம்படுத்தப்பட்டு, சாலைப் பராமரிப்புப் பணிகளுக்கு ஆண்டுதோறும் கூடுதலாக ₹2,000 கோடி நிதி ஒதுக்கீடு செய்ய அரசு முடிவெடுத்துள்ளது. இதன் மூலம் சாலைகளில் உள்ள பள்ளங்கள் முன்கூட்டியே கண்டறியப்பட்டு உடனுக்குடன் சீரமைக்கப்படும். சென்னை நகரின் முக்கிய நான்கு நுழைவு மற்றும் வெளியேறும் சாலைகளில் ஏற்படும் கடுமையான போக்குவரத்து நெரிசலைக் குறைப்பதற்கான விரிவான சாத்தியக்கூறு ஆய்வுகளும் இத்திட்டத்தின் கீழ் மேற்கொள்ளப்பட உள்ளன.
மறுபுறம், சாலைப் போக்குவரத்து மட்டுமின்றி ₹1,07,487 கோடி மதிப்பீட்டில் ‘மாநில கடல்வழிப் போக்குவரத்து மாஸ்டர் பிளான்’ ஒன்றும் தயார் செய்யப்பட்டுள்ளது. இதன் மூலம் நாகப்பட்டினத்தில் இருந்து இலங்கையின் கொழும்பு நகரத்திற்கும், மலேசியாவின் கோலாலம்பூர் நகரத்திற்கும் பயணிகள் கப்பல் போக்குவரத்தை இயக்குவது குறித்த முக்கிய ஆய்வுகள் நடத்தப்படவுள்ளன. மேலும், சென்னை – புதுச்சேரி இடையே சுற்றுலாப் படகு சேவை மற்றும் கன்னியாகுமரியில் விவேகானந்தர் பாறை – திருவள்ளுவர் சிலையை இணைக்கும் நவீன படகு சேவைகளும் இந்த 10 ஆண்டு பெருந்திட்டத்தில் இடம்பெற்றுள்ளன.
