கரூரில் கடந்த ஆண்டு நடைபெற்ற தவெக பிரச்சாரக் கூட்ட நெரிசலில் 41 பேர் பலியான விவகாரம் தொடர்பாக, ஆளும் தவெக மற்றும் எதிர்க்கட்சியான திமுக இடையேயான சட்டப் போராட்டம் அடுத்தகட்டத்தை எட்டியுள்ளது. இச்சம்பவம் குறித்து தவெக அமைச்சர் ஆதவ் அர்ஜுனா பொதுவெளியில் ஆற்றிய அனல் பறக்கும் பேச்சுக்கு முட்டுக்கட்டை போட திமுக உச்ச நீதிமன்றத்தை நாடியது. எனினும், அங்கு இடைக்கால மனுத் தள்ளுபடி செய்யப்பட்டதைத் தொடர்ந்து, திமுக தங்களது ‘அடுத்தகட்டத் திட்டமாக’ (Option B) ஓய்வுபெற்ற உச்ச நீதிமன்ற நீதிபதி அஜய் ரஸ்தோகி தலைமையிலான சிபிஐ (CBI) வழக்குகளைக் கண்காணிக்கும் குழுவிற்கும், சிபிஐ தலைமைக்கும் அவசரப் புகார் கடிதம் ஒன்றை அனுப்பியுள்ளது.
திமுக அமைப்புச் செயலாளர் ஆர்.எஸ்.பாரதி அனுப்பியுள்ள அந்த அதிகாரப்பூர்வ கடிதத்தில், ஜூலை 2 அன்று நடைபெற்ற தவெக இணைப்பு விழாவில் அமைச்சர் ஆதவ் அர்ஜுனா பேசிய கருத்துக்களை முதன்மையாகச் சுட்டிக்காட்டியுள்ளார். “கரூரில் காவல்துறையை ஏவி விட்டு கூட்ட நெரிசலைத் திட்டமிட்டு உருவாக்கி, மக்களைக் கொன்றதே முந்தைய திமுக அரசுதான்; இதற்கு நாங்கள் வட்டியும் முதலுமாகப் பதிலடி கொடுப்போம்” என்று ஆதவ் அர்ஜுனா பேசியுள்ளார். இந்த வழக்கு தற்போது சிபிஐ வசம் இருக்கும் நிலையில், அதில் முக்கியக் குற்றவாளியாக (Accused) இருக்கும் ஒரு அமைச்சரே, இப்படிப் பொதுவெளியில் பேசி மத்தியப் புலனாய்வு அமைப்பின் விசாரணையைத் திசைதிருப்பவும், சாட்சிகளை அச்சுறுத்தவும் முயல்வதால் அவர் மீது சிபிஐ உடனடியாகப் புதிய எப்.ஐ.ஆர் (FIR) பதிவு செய்து சட்ட நடவடிக்கை எடுக்க வேண்டும் என திமுக கோரியுள்ளது.
மேலும், வரும் ஜூலை 10 அன்று தமிழ்நாட்டின் முதலமைச்சர் சி. ஜோசப் விஜய் கரூருக்கு நேரில் சென்று, பாதிக்கப்பட்ட 41 குடும்பங்களைச் சந்தித்து அரசு வேலைவாய்ப்புகள் மற்றும் அரசாணைகளை வழங்கத் திட்டமிட்டுள்ளதை அந்தக் கடிதத்தில் திமுக சுட்டிக்காட்டியுள்ளது. கரூரில் உயிரிழந்த மற்றும் காயமடைந்த விளிம்புநிலை மக்களின் குடும்பங்களே இந்த சிபிஐ வழக்கின் மிக முக்கியமான முதன்மைச் சாட்சிகள் (Material Witnesses) ஆவர். எனவே, சிபிஐ விசாரணை முழுமையாக முடிவடையும் வரை, முதலமைச்சர் விஜய் மற்றும் தவெக அமைச்சர்கள் இந்தச் சாட்சிகளை நேரடியாகத் தொடர்புகொள்வதை சிபிஐ தனது நேரடிக் கண்காணிப்பின் கீழ் கொண்டு வர வேண்டும் என்றும், அவர்களின் தலையீடுகளை முழுமையாக முறைப்படுத்த வேண்டும் என்றும் திமுக வலியுறுத்தியுள்ளது.
உச்ச நீதிமன்றத்தில் திமுக தாக்கல் செய்த இடைக்கால மனுவை விசாரித்த நீதிபதிகள் கே.வி. விசுவநாதன் அமர்வு, “முதலமைச்சர் விஜய் இதில் சாட்சிதானே தவிர, குற்றவாளி அல்ல; அரசியல் சண்டைகளுக்காக நீதிமன்றத்தை மேடையாக்க வேண்டாம்” என்று கூறி மனுவைத் திரும்பப் பெறச் செய்தது. இருப்பினும், “பாதிக்கப்பட்டவர்கள் மீது அமைச்சர்கள் அழுத்தம் கொடுப்பதாகக் கருதினால், நீதிமன்ற அவமதிப்பு வழக்கோ அல்லது கண்காணிப்புக் குழுவிடமோ நீங்கள் முறையிடலாம்” என்ற நீதிமன்றத்தின் சட்டரீதியான ஆலோசனையைப் பயன்படுத்தியே, திமுக தற்போது சிபிஐ மற்றும் உச்ச நீதிமன்றத்தின் ஓய்வுபெற்ற நீதிபதி குழுவுக்கு இந்தக் கடிதத்தை அனுப்பி தவெக அரசுக்கு அடுத்த நெருக்கடியைக் கொடுத்துள்ளது.
